Itempa Dadiwahi
MPANJI 2
Itempa Dadiwahi
TALAÑA idi iseki! Yuma yejima chiyinakumwekana okuwaha! Talaña nyitondu nimatahu, ninkenu nianyama ejima. Wunatweshi kwinyika nzovu nianyitupa?
Indi idi itempa dadiwahi dekaliliku ñahi? Twayenu tutali ntahi Nzambi chatwiloñesheleliyi iseki.
Chatachi, Nzambi waleñeli matahu kulonda kubuta maseki. Dichi waleñeli nyichidi yejima yayipuuta nimasaña ninyitondu. Iyi yuma yamenaña yakwashaña iseki kumwekana lubanji. Ilaña yazataña yuma yayivulu kubadika haniyi. Nyitondu yayivulu yatwinkaña yakudya yatiyakanaña chiwahi chikupu.
Hanyima Nzambi waleñeli inshi kulonda yikali mumenji niatujila kulonda atuukeña muluzwizu. Waleñeli atuwa niatumesha niatuwalu; nianyama amaneni nianyama anyanya. Anyamanyi ekala kwakwihi nakuwashakamaña? Komana hitwatela kutiya kuwaha nanochu Nzambi chatwileñeleliyi yuma yejimiyiku?
Nkumininaku, Nzambi waleñeli chibalu chimu cheseki kwikala iluña dambukaku chikupu. Waditumbili iluña denidi nindi itempa daEdeni. Dadiña dawanina. Yuma yejima yadiña yalubanji. Nzambi wakeñeleña nindi iseki dejima dikali neyi idi itempa dadiwahi daleñeliyi.
Ilaña talaku cheñi hamwevulu wanidi itempa. Wuneluki chuma chamweniyi Nzambi nindi chabulilimu? Twayenu tutali ntahi.
