LUKIM earth long hia! Evri samting luk naes tumas! Lukim grass and olketa tree, olketa flaoa and olketa animal. Waswe, iu savve which wan nao elephant and lion?

Hao nao disfala naesfala garden kamap? Iumi bae lukim hao God hem redyim earth for iumi.

First samting, God wakem green grass for kavarem graon. And hem wakem olketa difren kaen smolfala plant and tree. Olketa samting hia wea grow mekem earth luk naes. Bat olketa duim samting moa. Plande long olketa givim iumi kaikai wea teist naes tumas tu.

Bihaen God wakem fish for swim insaed long wata and olketa bird for flae long skae. Hem wakem olketa dog and puskat and horse; olketa bigfala and smolfala animal. Wanem kaen animal nao stap klosap long ples bilong iu? Waswe, iumi hapi from God wakem evri samting hia for iumi?

Then, God mekem wanfala part long earth olsem wanfala spesol ples. Hem kolem disfala ples garden bilong Eden. Hem barava naes fogud. Evri samting insaed luk naes tumas. And God laekem full earth for kamap naesfala ples olsem disfala garden.

Bat luk moa long piksa bilong disfala garden. Waswe, iu savve wanem nao God hem savve no stap long there? Bae iumi lukim.