¡CHAWILAMPEʼ ri Ulew! ¡Sibʼalaj utz ronojel! Chawilampeʼ ri täq qʼayes xuqujeʼ ri täq cheʼ, ri täq kotzʼiʼj xuqujeʼ ri täq chiköp. ¿Kawilo ni o jachiʼ kʼo wi ri elefante xuqujeʼ ri täq köj?

¿Chin xbʼanow wajun utz kotzʼiʼjalaj Ulew? Chqilaʼ su xubʼan ri Ajawaxel che ubʼanik ruwäch Ulew qech qonojel.

Nabʼe, ri Ajawaxel xubʼan ri qʼayes rech kuchʼuq ruwäch Ulew. Xubʼan jalajoj täq uwäch tikoʼn xuqujeʼ jalajoj täq uwäch cheʼ. Chiʼ kekʼiy wariʼ sibʼalaj utz kubʼan ruwäch Ulew rumal wariʼ. Xiw ta kʼut wariʼ kipatan. Kʼi chike kkeya utzalaj su täq ktijawik chaqe.

Tekʼuriʼ xeʼubʼan ri täq kär rech e kʼo pa ri jaʼ xuqujeʼ täq tzʼikïn (o chiköp kerapan) pa ri kaj. Xeʼubʼan ri täq tzʼiʼ, täq meʼs xuqujeʼ ri täq kej; nimaʼq täq chiköp xuqujeʼ alaj täq chiköp. ¿La e kʼo täq chiköp naqaj che awachoch? ¡Qas sibʼalaj utz ri Ajawaxel qukʼ chiʼ xubʼan ronojel!

Kʼisbʼal re, ri Ajawaxel xubʼan sibʼalaj utz che jun chʼaqap Ulew. Xubʼij kotzʼiʼjalaj Edén che. Kʼot itzelal chupam. Sibʼalaj utz ronojel. Xuqujeʼ ri Ajawaxel xraj che ronojel ruwäch Ulew junam rukʼ ri kotzʼiʼjalaj Ulew xubʼan nabʼe.

Chqila chi na wajun wachbʼäl. ¿Awetaʼm su xril ri Ajawaxel che kraj na pa wajun kotzʼiʼj uwäch Ulew?