KUNEETI baatto lai! Baalunkuri hiitto biifino! Hayiisso, haqqe, daraaro, saadano baalanta lai. Daaniichchonna doobbiyo badde kula dandaatto?

Tini biifado kaashshu base qixxaabbinohu hiittoonniiti? Maganu uulla ninkera hiitto asse qixxeessinoro hanni laˈno.

Umo, Maganu hayisso kalaqe uulla amaddanno gede assi. Qoleno duuchchu danita shiimmaadda muˈro, citanna haqqe kalaqi. Uulla biifisinori kuriuuti. Ikkollana tini muˈro hakkiinni saˈino horo afidhino. Batinynye muˈro lowo geeshsha coommitanno sagale ikkitanno.

Gedensaannino Maganu waa daakkanno gede qulxuˈme, iima buubbanno gede cea kalaqi. Qoleno woshsha, basurroota, farado, hattono jajjabbanna shiimmaadda saada kalaqi. Qachchiˈnera hiitti saada heedhanno? Maganu kuriuu baala ninkera kalaqino daafira hagiidha dihasiissannonke?

Jeefoteno Maganu uullanniha mitto gafa bade baxxitino base asse qixxeessi. Tenne basera Edenete kaashshu base yee suˈma fushshi. Tini base lowo geeshsha biifadote. Hakko noori baalunku biifadoho. Qoleno Maganu woˈma uulla, tenne isi biifise kalaqino base gedeeta ikkitara hasiˈranno.

Ikkollana hanni tenne kaashshu base misile galagalte lai. Maganu kalaqikki gatinori noota afino; kuni maatiro afootto? Hanni laˈno.