БО черни көрүп көрем! Шупту чүве кайы-хире чараш-тыр! Оът-сиген, ыяштар, чечектер база шупту дириг-амытаннарже көрүп көрем! Мында чаан биле арзылаңны тып шыдаар сен бе?

Бо кайгамчыктыг сад кайыын тыптып келгенил? Ынчаарга Бурган бистерге черни канчаар белеткеп турганыл, билип алыылам.

Эгезинде ол черни ногаан сиген-биле шыпкан. Ооң соонда ол хөй бичии үнүштерни, хараганнарны, ыяштарны чаяаган. Ооң ужурунда чер кайгамчыктыг чараш апарган. Ынчалза-даа олар оон-даа өске дузаны чедирип турар. Оларның хөй кезии дыка амданныг чимистерни берип турар.

Ооң соонда Бурган сугларны балыктар-биле долдуруп, кушкаштарны дээрге ужар кылдыр чаяап каан. Ол диистерни, ыттарны, аъттарны, улуг-даа, бичии-даа дириг-амытаннарны база чаяаган. Сээң бажыңының чанында кандыг дириг-амытаннар чурттап турарыл? Бо бүгүнү Бурган биске бергени дээш өөрүвес аргавыс чок, ындыг аа?

Ооң соонда черниң бир кезиинге Бурган тускай черни аңгылаан. Ынчангаш ол ону Эдем сады деп адаан. Аңаа шупту чүве тергиин чараш турган. Бүгү чүве кайгамчык аянныг болган. Бүгү чер ол сад ышкаш кайгамчыктыг чараш болурун Бурган күзеп турган.

Ынчалза-даа база катап бо садтыг чурукче көрүп көрем. Бурганның саналы-биле алырга, аңаа чүү чедишпейн турганыл, билир сен бе? Билип алыылам.