¡ILAWIL te Balumilale! ¡Kʼax tʼujbil spisil! Ilawil te akiltik sok te teʼetik, te nichimetik sok spisil te chambalametike. ¿Yabal awil te banti ay te tsemen sok te chojetike?

¿Machʼa la spas te tʼujbil nichimal kʼinal ini? Jaʼ te Diose. Ya kiltik bin utʼil la schajpan Dios te Balumilal ta jwentatik.

Ta sbabial, te Dios la spas yaxal akiltik yuʼun la smuk-a te lum kʼinale. La spas spisil ta chajp jaʼmal nichimetik sok tut jaʼmaletik soknix mukʼul teʼetik. Spisil te bintik ya xchʼi ini jaʼ tʼujbilxan ya xkʼot yuʼun te Balumilale. Jaʼukmeto ma jaʼuknax-abi, melel ay bayal te bin ya yakʼ jweʼtik te bujtsʼanike.

Ta patil te Dios la spas te chayetik yuʼun ya xnuxik ta jaʼ soknix la spas te jaʼmal mutetik yuʼun ya xwilik ta yolil chʼulchan. La spas tsʼiʼetik, xawinetik, o misetik, sok kawuetik; mukʼul chambalametik sok tut chambalametik. ¿Aybal chambalametik te banti ayat ta nainele? ¡Kʼax lek yoʼtan te Dios te la spastiklan spisil ta jwentatik ini!

Ta slajibal, te Dios la spas jsejpuk kʼinal te yanxanix yilel-ae, te la yakʼbey sbiilin tsʼumbil kʼinal Edén. Kʼax lek spisil-a. Spisil tʼujbil te bintik ay tey-ae. Te Dios la skʼan te jichuk ya xkʼot ta tʼujbil nichimal kʼinal ta swolol te Balumilal jich te bitʼil la spas ta nailale.

Jaʼukmeto ilawil ta yan buelta te lokʼombae. ¿Yabal anaʼ bin la yil Dios te ayto bin ya skʼan ta banti te nichimal kʼinale? Yato kiltik bael ta patil.