Ododo 3

Laco ki Dako Mukwongo

NGO mapat ki i cal man? Ada, dano ma tye iye-ni. Gin aye laco ki dako mukwongo. Anga ma oyubogi? Lubanga. In ingeyo nyinge? Nyinge Jehovah. Laco ki dako-ni kilwongogi ni Adam ki Kawa.

Man aye kit ma Lubanga Jehovah ocweyo kwede Adam. En okwanyo apwa ki i ngom ci oyubo ki kom ma pe ki roc, kom laco. En okuto yamo i um laco, ci Adam ocako kwo.

Lubanga onongo tye ki tic pi Adam. En owaco ki Adam me cako nying kit kwai lee mapatpat ducu. Adam myero bed kong oneno lee pi kare malac oweko en oyero nying mabeco loyo pi gin ducu. I kare ma Adam onongo tye ka cako nying lee en ocako neno gin mo. Ingeyo ngo ma gin meno obedo?

Lee ducu onongo tye ki luwotgi. Baba pa lyec ki mama pa lyec onongo tye, ki bene baba pa labwor ki mama pa labwor onongo tye. Ento Adam onongo lawote pe. Pi meno Jehovah omiyo Adam onino adada, ci en okwanyo cogo rege acel ki i bute. Jehovah otiyo ki rege man me yubo lawot Adam, ci lawote-ni odoko dakone.

Adam onongo dong iye yom adada! Tam bene kit ma Kawa iye obedo yom kwede pien gikete me kwo i poto maber kit meno! Gin onongo dong giromo nywalo lutino dok gikwo kacel ki yomcwiny.

Jehovah omito ni Adam gin ki Kawa gubed kwo matwal. En omito ni gin guyub lobo ducu odok maber marom aroma ki poto me Eden. Omyero obed ni Adam gin ki Kawa gubedo ki yomcwiny mada ka gitamo pi timo man! Onongo iromo maro nywako tic me yubo lobo wek odok poto maber? Ento yomcwiny pa Adam gin ki Kawa pe ori. Wanenu kong pingo.

Jabuli 83:18; Acakki 1:26-31; 2:7-25.