KULISA chika chili ha chizulie chino? Chochene, atu alioho. Ayo kali lunga ni pwo mutangu. Iya waatangile? Zambi mwe waatangile. Yena unanyingika jina lia Zambi? Jina lienyi Yehova. Nawa atu jacho te kakwaavuluka ngwo Alama ni Eva.

Yehova Zambi yalinga Alama chino: Iye yakwata fufuta ya mavu yayiwumba umwe mujimba ungunu, mujimba wa umwe lunga. Hohene Zambi yamufuza mwiku mu mazulu, mba Alama yapwa ni mwono.

Yehova Zambi te kali ni umwe mulimo hanga auhane kuli Alama. Iye yamba kuli Alama hanga aluke majina kuli tushitu eswe. Kota Alama kanakapalikisa mashimbu anji ni kutala kanawa tushitu, hanga ehe majina waze analite. Alioze ha kuluka majina jacho iye yaputuka kumona chimwe chuma. Yena unanyingika chuma chacho?

Tushitu eswe te kali kuji ni chihwo. Njamba te kali ni tato ni naye, ndumba ni neye te kali ni tato ni naye. Alioze Alama te kali ukawenyi. Kashika Yehova yamwaha tulo anji, mba yamuchiza umwe lupachi. Ku lupachi wacho Yehova yamulingila umwe pwo, iye yapwa mukwo-pwo.

Alama yawahilila chinji! Achinyonga kama chiseke chinji chize Eva evwile ha kupwa ni umwe munda upema wakutwama! Ha chino ayo te mahasa kupwa ni ana ni kutwama hamuwika ni uwahililo unji.

Yehova te kanazange hanga Alama ni Eva atwame ni mwono wa miaka yeswe. Iye te kanazange hanga ayo apemese hashi heswe hanga hapwe ngwe munda wa Endene. Alama ni Eva chiseke chinji te akwivwa ha kunyonga maliji jacho! Yena te muzanga kukwasa kulinga mulimo wa kululieka hashi hanga hapwe munda upema? Alioze uwahililo wa Alama ni Eva wakatwamine chinji. Mututala mumu liaka.