DIDI oware u wo ohẹriẹ eva ifoto enana? Ẹhẹ, ahwo nọ a riẹ na. Eye na yọ ọzae avọ aye ọsosuọ. Ono o ru rai? Ọghẹnẹ o ru rai. Kọ whọ riẹ odẹ riẹ? Jihova họ odẹ riẹ. Yọ ọzae avọ aye na a te sae Adamu avọ Ivi.

Oghẹrẹ utiona Jihova Ọghẹnẹ o ro ru Adamu. Ọ rehọ ẹkpẹ jọ no otọ ze ọ tẹ rehiẹ ru ugboma nọ o gba, ugboma ọzae. Kẹsena o te vovo inwe ọzae na, koyehọ Adamu ọ ze uzuazọ.

Jihova Ọghẹnẹ o wo iruo kẹ Adamu. Ọ ta kẹ Adamu nọ o mu edẹ kẹ egheghẹrẹ erao na kpobi. O te jọ nọ Adamu ọ nabi muẹrohọ erao na evaọ oke krẹki re ọ sae sanọ edẹ nọ i re fo kae kpobi. Okenọ Adamu o je muodẹ kẹ erao na, o te muẹrohọ oware jọ. Kọ whọ riẹ oware na?

Erao na kpobi i wo erivẹ rai. Ini esemọ gbe ini iniemọ e jariẹ, yọ ikpohrokpo esemọ gbe ikpohrokpo iniemọ e jariẹ re. Rekọ Adamu o wo ohwo ọvuọvo nọ ọ rẹ jọ ọrivẹ riẹ hẹ. Fikiere Jihova o te ru Adamu re o kiefihọ owezẹ udidi, koyehọ ọ rehọ ugbegbe ubiofẹ abọ riẹ jọ. Jihova ọ tẹ rehọ ubiofẹ onana ru aye kẹ Adamu, o te zihe ruọ aye riẹ.

Kẹvẹ eva e were Adamu te enẹna! Who je roro epanọ eva e rẹ were Ivi te re, nọ a ro fie i họ ogege owowoma otioye re ọ ria! Enẹna a sai wo emọ a vẹ ria kugbe evaọ oghọghọ.

Jihova ọ gwọlọ nọ Adamu avọ Ivi a rẹ ria bẹdẹ bẹdẹ. Ọ gwọlọ nọ a re ru otọakpọ na kpobi fihọ wowoma epanọ ogege Idẹn ọ jọ na. K’ẹvẹ eva e rẹ were Adamu avọ Ivi te re nọ a te roro kpahe iruẹru enana! Whọ hẹ gwọlọ wo obọ kugbe iruẹru otọakpọ na fihọ ogege owowoma? Rekọ oghọghọ Adamu avọ Ivi u kri hi. Ma gwọlọ oware nọ o soriẹ ze.