ANIHEBʼ li wankebʼ saʼ li eetalil? Aʼan li xbʼeen winq ut li xbʼeen ixq. Ani kiyoobʼtesink chaq rehebʼ? Aʼan li Yos. Ma nakaanaw ani xkʼabʼaʼ li Yos? Jehobʼa xkʼabʼaʼ. Aj Adan ut xʼEva xkʼabʼaʼebʼ li qas qiitzʼin aʼin.

Li Jehobʼa kixyoobʼtesi laj Adan rikʼin xpoqsil li chʼochʼ. Kirapu saʼ ruʼuj ut chi joʼkan laj Adan kiwank xyuʼam.

Ma nakaanaw kʼaru li kʼanjel kikʼeheʼk re laj Adan? Li Yos kixye re laj Adan naq tixkʼe xkʼabʼaʼebʼ li jalan jalanq chi xul. Naabʼal kutan tana kiʼajmank, re xkʼeebʼal chiʼus xkʼabʼaʼ li junjunq chi xul. Naq laj Adan yook xbʼaanunkil li kʼanjel aʼin, ma nakaanaw kʼaru kixkʼe reetal?

Kiril naq ebʼ li xul wankebʼ saʼ sumal, joʼebʼ li kaqkoj ut ebʼ li kokʼ tzʼik. Abʼan laj Adan maakʼaʼ rochbʼeen. Joʼkan naq li Jehobʼa kixwartesi laj Adan ut kirisi jun xbʼaqel chi xkʼatq xsaʼ. Rikʼin li bʼaqel aʼin, kixyiibʼ jun li ixq ut kixkʼe choʼq rixaqil.

Kʼajoʼ naq kisahoʼk saʼ xchʼool laj Adan naq kikʼeheʼk rochbʼeen! Joʼkan ajwiʼ li xʼEva naq kikʼeheʼk saʼ li chʼinaʼusil naʼajej! Saʼ li naʼajej aʼin sa raj keʼwank rikʼinebʼ li ralal xkʼajol.

Li Jehobʼa kiraj naq laj Adan ut xʼEva keʼwank raj xyuʼam chi junelik. Kiraj ajwiʼ naq teʼxyiibʼ chixjunil li Ruuchichʼochʼ joʼ li chʼinaʼusil naʼajej Eden. Kʼajoʼ tana keʼsahoʼk saʼ xchʼool laj Adan ut xʼEva naq keʼrabʼi naq teʼoq xkʼanjelankil ru li chʼochʼ! Ma xwulak raj chaawu xtenqʼankilebʼ? Kʼaʼut naq laj Adan ut xʼEva saʼ junpaat keʼok xkʼulbʼal li rahilal?