OSHIKE u wete mefano eli osho shihe li mefano olo la tetekela? Ovanhu ovo va shitwa tete, omulumenhu nomukainhu. Ova shitwa kulyelye? Ova shitwa kuKalunga. Mbela ou shii kutya edina laKalunga olyelye? Edina laKalunga oJehova. Edina lomulumenhu oo e li mefano oAdam. Edina lomukainhu oEva.

Kalunga okwa shita Adam okudja peni? Kalunga okwa kufa ondwi yedu ndele te i me i ninge olutu lomunhu la wanenena. Opo nee okwa fudila momayulu aAdam omufudo, ndele ta ningi omunamwenyo.

Jehova Kalunga okwa li a pa Adam oilonga e i longe. Okwa lombwela Adam a luke oinamwenyo aishe omadina. Otashi dulika Adam a kala ta tale oinamwenyo efimbo lile opo e i pe omadina oo taa wapalele. Pefimbo olo Adam a li ta luku oinamwenyo omadina, ope na oshinima shimwe osho a li a didilika. Mbela ou shi shii kutya oshike osho a li a didilika?

Oinamwenyo aishe oya li oivali, oshindume noshikadi. Opa li eendjaba deendume nodeenghadi. Opa li yo eenghoshi deendume nodeenghadi. Ndele Adam okwa li oye aeke. Ka li e na omukulukadi. Onghee hano, Jehova okwa kofeka Adam eemhofi didjuu ndele ta kufa mo olupati limwe molutu laAdam. Opo nee okwa shitila Adam omukainhu okudja molupati laye.

Adam ka li tuu a hafa! Eva naye ka li tuu a hafa eshi a tulwa moshikunino osho sha li shiwashiwa. Kungaho, Adam naEva ova li tava dulu okudala ounona nokuhafela onghalamwenyo pamwe navo.

Jehova okwa li a hala Adam naEva va kale nomwenyo fiyo alushe. Okwa li a hala va wapeke edu alishe li kale ngaashi oshikunino shaEden. Adam naEva kava li tuu va hafa eshi va li va pewa oshilonga osho! Ngeno opo wa li, mbela ngeno ito kala wa hafa okulonga oilonga yokuwapeka edu li kale ngaashi oshikunino shaEden? Ashike Adam naEva inava ka kala vali tava hafele onghalamwenyo. Natu taleni kutya omolwashike.