VIUMA vika via viha vili ha fikula? Eyo, vantu va liho. Va yala na mpuevo va katete. Iya ua va tangele? Njambi. Ua tantekeya lizina lieni ni? Ikeye Yehova. Kaha mazina ava va yala na mpuevo va Andama na Eva.

Yehova Njambi ua lingile ngecize linga a tange Andama. Ua nonele imo mpumputa ku livu kaha ua mungile muvila ua ku tantuluka, muvila ua yala. Ngeci ua huiminine mu mazulu a yala, kaha Andama ua putukile ku yoya.

Yehova Njambi ua hele cimo cipanga kuli Andama. Ua lekele Andama linga a luke mazina ku tusitu va kuli seza-seza. Andama ua talele tusitu ntsimbu ya ingi ngeci ua hasele ku luka vose mazina a ku va fuila. Omo Andama ua kele na ku luka tusitu mazina, ua muene vimo. Ua tantekeya vika ua muene?

Tusitu vose va puile vavali vavali. Kua kele va sanjamba na nianjamba, kaha kua kele naua va sandumba na niandumba. Vunoni Andama ka kele na umo ua ku li fua neni uahi.  Ngeci Yehova ua uisilile Andama mu tulo va kama, kaha ua nonene mpati yeni imo. Na mpati yaco, Yehova ua pangele mpuevo linga a kale na Andama, kaha ua puile mpueyeni.

Andama ua viukilile cikuma! Kaha aci singanieke ndzolela ya vuile Eva omo va mu hakele mu citungu ca cili linga a yoyelemo! Kaha tele nga ve ku semene vana na ku yoya hamo mu ndzolela lika.

Yehova ua tondele ngueni va Andama na Eva va yoye miaka yose. Ua tondele linga va viukise mavu ose ngue mu ca puile citungu ca Endene. Va Andama na Eva va vuile ndzolela ya kama mu va singaniekele ku va hana cize cipanga! Nga nove ku ua kele, nga ua va kuatesele ku cipanga mu ku lingisa mavu ose a pue citungu ni? Vunoni eyi ndzolela ya va Andama na Eva ka ya simbuile. Tu ci tantekeye omo lia vika.