Ekitebyo 3

Omushaija n’Omukazi ab’Okubanza

N’ENKI eky’omutaano omuri eki kishushani? Eego, n’abantu abakirimu. N’omushaija hamwe n’omukazi abaabandize. N’oha owaabahangire? Ni Ruhanga. Noomanya eiziina rye? Niwe Yehova. Kandi omushaija n’omukazi bakeetwa Adamu na Haawa.

Oku nikwo Yehova Ruhanga yaahangire Adamu. Akakwata omucuucu gw’ahansi yaagubumbamu omubiri oguhikiriire, omubiri gw’omushaija. Bwanyima yaahuuha omu nyindo z’omushaija, kandi Adamu yaaba ohuriire.

Yehova Ruhanga akaba ainiire Adamu omurimo. Akagambira Adamu kweta enyamaishwa zoona amaziina. Adamu aine kuba yaayetegyereize enyamaishwa kumara obwire buraingwa atyo yaabaasa kuziheereza amaziina agazishemereire zoona. Obu Adamu yaabaire naayeta enyamaishwa amaziina, haine eki yaayetegyereize. Noogira eki kikaba kiri ki?

Buri nyamaishwa yoona ekaba eine ngyenzi yaayo. Hakaba harimu enjojo enshaija n’enjojo enkazi, kandi n’ebicuncu ebishaija n’ebikazi. Kwonka Adamu akaba ataine ow’okuba mugyenzi we. Atyo Yehova yaagwejegyeza Adamu obutasisiimuka, kandi yaamwihamu orubaju rumwe. Arikukoresa eigufa ry’orubaju orwo, Yehova yaarihangamu omukazi yaamuha Adamu, kandi yaaba omukazi we.

Adamu ka yaashemereirwe munonga! Kandi teekateeka oku Haawa yaashemereirwe okuteebwa omu mwanya murungi nk’ogwo kutuuramu! Hati bakaba nibabaasa kuzaara abaana kandi bakatuura hamwe omu kushemererwa.

Yehova akaba naayenda ngu Adamu na Haawa bagumeho ebiro byona. Akaba naabendeza okuhindura ensi yoona kuba nungi nk’omusiri gwa Edeni. Adamu na Haawa baine kuba baashemereirwe ku baateekateekire aha kukora eki! Okaakunzire okubagana omu murimo gw’okuhindura ensi kuba nungi nk’omusiri gwa Edeni? Kwonka okushemererwa kwa Adamu na Haawa tikuragumireho. Ka twetegyereze n’ahabw’enki.

Zaaburi 83:18; Okutandika 1:26-31; 2:7-25.