EAA te mea tuke i roto i teia tutu? Ae, ko te nga tangata i roto. Ko raua te tangata e te vaine mua. Naai raua i maani? Na te Atua. Kua kite koe i tona ingoa? Ko Iehova. E kua kapikiia te tane e te vaine ko Adamu e Eva.

Akapenei te Atua ko Iehova i te maani anga ia Adamu. Kua rave aia i te one pueu no runga i te enua e kua anga i tetai kopapa apa kore, e kopapa tane. I reira kua pupui aia ki roto i te putangiu o te tane, e kua riro mai a Adamu ei tangata ora.

E angaanga ta te Atua ko Iehova na Adamu. Akakite aia kia Adamu kia tapa i te ingoa o te au manu tuketuke ravarai. Penei kua akarakara ana a Adamu i te au manu no tetai tuatau roa, kia rauka iaia te iki i te au ingoa tau meitaki tikai no ratou katoatoa. Iaia e tapa ra i te ingoa o te au manu, kua kite mai aia i tetai mea tuke. Kua kite koe e eaa te reira?

E tokorua to te au manu pouroa. E au papa erepani e te au mama erepani, e au papa riona e te au mama riona. Inara kare o Adamu tokorua. I reira kua tamoe a Iehova ia Adamu, e kua kiriti i tetai o tona ivi kaokao. Kua taangaanga a Iehova i te ivi kaokao i te maani i tetai vaine na Adamu, e kua riro mai aia ei vaine nana.

Mataora tikai a Adamu i teianei! E akamanako ana e mei teaa ra te mataora o Eva kia tukuia ki roto i tetai kainga manea noo ei! Teianei ka anau ta raua tamariki e ka noo kapiti ma te mataora.

Inangaro a Iehova ia Adamu raua ko Eva kia noo e mutu kore ua atu. Inangaro aia ia raua kia akariro i te enua katoa ei ngai manea mei te kainga rai i Edene. Mataora tikai a Adamu raua ko Eva i te akamanako anga i te rave i teia! Ka inangaro ainei koe i te piri atu i te akariro anga i te enua ei kainga manea? Tera ra kare te mataora o Adamu raua ko Eva i roa ana. Ka akara tatou i te tumu.