SAN de tra fasi na tapu a prenki disi? Iya, a de den libisma di de na tapu — a fosi man nanga uma. Suma ben meki den? Na Gado ben meki den. Yu sabi a nen fu Gado? En nen na Yehovah. A nen fu a man nanga na uma na Adam nanga Eva.

Yehovah Gado ben meki Adam na a fasi disi: A ben teki pikinso doti fu a gron, èn nanga dati a ben meki wan skin di ben bun dorodoro, a skin fu wan sma. Ne a ben bro na ini a noso fu a sma, èn Adam ben kon na libi.

Yehovah Gado ben abi wan wroko gi Adam. A ben taigi Adam fu gi ala den difrenti sortu meti wan nen. Adam kande ben luku den meti wan langa pisi ten, so taki a ben kan gi den alamala wan nen di ben fiti den srefisrefi. Aladi Adam ben e gi den meti wan nen, dan a ben bigin si wan sani. Yu sabi san?

Ala den meti ben abi wan patna. Yu ben abi papa-asaw nanga mama-asaw, papa-lew nanga mama-lew. Ma Adam no ben abi wan patna. Fu dati ede Yehovah ben meki Adam fadon na wan dipi sribi. Ne a teki wan lebriki fu Adam. Fu a lebriki disi, Yehovah ben meki wan uma gi Adam. Na uma ben tron en wefi.

Now Adam ben de koloku srefisrefi! Èn prakseri fa Eva ben breiti fu mag libi na ini so wan moi dyari! Now den ben man kisi pikin, den ben man libi koloku nanga makandra.

Yehovah ben wani Adam nanga Eva fu libi fu têgo. A ben wani fu den meki heri grontapu kon moi neleki a dyari fu Eden. Adam nanga Eva ben musu prisiri srefisrefi fu mag du disi! Yu no ben sa feni en wan switi sani fu yepi meki grontapu kon tron wan moi dyari? Ma a koloku fu Adam nanga Eva no ben tan langa. Meki wi go luku fu san ede.