3-нҗи хекая

Илкинҗи эркек ве аял

БУ СУРАТЫҢ өңдәки суратдан нәме тапавуды бар? Догры, бу суратда адамлар бар. Бу илкинҗи эркек ве аял. Олары ким яратдыка? Худай. Худайың адыны билйәңми? Онуң ады Ехова. Эркек адам билен аяла болса, Адам ата хем-де Хов эне диен ат дакылды.

Ехова Худай Адам атаны, ине, шейле яратды. Худай ерден топрак алып, кәмил ынсан беденини ясады. Соңра Адам атаның бурнуна үфледи, ол хем дири җан болды.

Ехова Худай Адам ата юмуш буюрды. Ол әхли хайванлара ат дакмалыды. Лайык гелйән ады сайламак үчин, Адам ата олара көп сын эден болмалы. Эмма хайванлара ат дакып йөркә, бир зада үнс берди. Нәмә үнс беренини билйәңми?

Әхли хайванлар җүбүт-җүбүт болуп яшаярды. Бу ерде ата пиллер хем эне пиллер, ата ёлбарслар хем-де эне ёлбарслар барды. Диңе Адам атаның тайы ёкды. Шонда Ехова Адам атаны гүйчли ука гидирип, онуң бир гапыргасыны алды. Онсоң гапыргадан аял ясады, ол хем Адам атаның аялы болды.

Адам ата инди, гөр, нәхили багтлы боландыр! Гөз өңүне гетирип гөр! Аҗайып багда яшаяндыгы үчин, Хов эне өзүни нәхили багтлы дуян болса герек! Инди оларың чагалары болуп, багтлы яшап билердилер.

Ехова Адам ата билен Хов энәниң бакы яшап, бүтин ер йүзүни Эрем багына өвүрмегини иследи. Адам ата билен Хов эне этҗек ишлерини гөз өңүне гетирип, өзлерини, гөр, нәхили багтлы дуяндыр! Ер йүзүни аҗайып бага өвүрмәге сениңем гатнашасың гелермиди? Эмма Адам ата билен Хов энәниң багты узага чекмеди. Гел, себәбини билели.

Зебур 8:1; Барлык 1:26—31; 2:7—25