KO E HĀ ‘a e me‘a ‘oku kehe ‘i he fakatātā ko ‘ení? ‘Io, ko e kakai ‘oku hā ai. Ko e ‘uluaki tangatá mo e fefiné ia. Ko hai na‘á ne ngaohi kinauá? Ko e ‘Otuá. ‘Okú ke ‘ilo hono huafá? Ko Sihova. Pea na‘e fakahingoa ‘a e tangatá mo e fefiné ko ‘Ātama mo ‘Ivi.

Ko e anga ‘eni hono ngaohi ‘o ‘Ātama ‘e Sihova ko e ‘Otuá. Na‘á ne to‘o ha efu mei he kelekelé pea na‘á ne ngaohi mei ai ha sino haohaoa, ko e sino ‘o ha tangata. Peá ne toki hō ki he ava‘i ihu ‘o e tangatá, pea na‘e mo‘ui leva ‘a ‘Ātama.

Na‘e ‘i ai ‘a e ngāue na‘e tuku ‘e Sihova ko e ‘Otuá ke fai ‘e ‘Ātama. Na‘á ne tala ange kia ‘Ātama ke ne fakahingoa ‘a e fa‘ahinga manu kotoa pē. Na‘e nofo nai ‘a ‘Ātama ‘o fakasio ‘i ha taimi lahi ki he fanga manú koe‘uhi ka ne lava ke ‘ai ‘a e hingoa lelei taha kiate kinautolu kotoa pē. Lolotonga ‘a e taimi na‘e fakahingoa ai ‘e ‘Ātama ‘a e fanga manú na‘á ne kamata ke fakatokanga‘i ha me‘a. ‘Okú ke ‘ilo pe ko e hā nai ia?

Na‘e ‘i ai ‘a e ngaahi hoa ki he fanga manu kotoa pē. Na‘e ‘i ai ‘a e ngaahi ‘elefānite tangata mo e ‘elefānite fefine, pea na‘e ‘i ai foki mo e laione tangata mo e laione fefine. Ka ko ‘Ātama na‘e ‘ikai hano hoa. Ko ia na‘e ‘ai ‘e Sihova ‘a ‘Ātama ke mohe ma‘u, peá ne to‘o hono hui vakavaka ‘e taha. Na‘e ngāue‘aki ‘e Sihova ‘a e hui vakavaka ko ení ke ngaohi ha fefine kia ‘Ātama, pea na‘e hoko ia ko hono uaifi.

Ko e toki fiefia ē ka ko ‘Ātama! Pea ke fakakaukau atu ki he fiefia ‘a ‘Ivi ‘i hono ‘ai ia ke nofo ‘i ha ngoue mātu‘aki faka‘ofo‘ofa pehē fau! Na‘e toki malava ke na ma‘u ha fānau pea nofo fakataha ‘i he fiefia.

Na‘e fiema‘u ‘e Sihova ke mo‘ui ta‘engata ‘a ‘Ātama mo ‘Ivi. Na‘á ne fiema‘u kinaua ke na ngaohi ‘a e māmaní kotoa ke faka‘ofo‘ofa ‘o hangē pē ko e ngoue ko ‘Ītení. Ko e toki fiefia ē ‘a ‘Ātama mo ‘Ivi ‘i he‘ena fakakaukau atu ke na fai ‘a e me‘á ni! Kapau na‘á ke ‘i ai te ke fie kau ‘i he ngaohi ‘o e māmaní ko ha ngoue faka‘ofo‘ofá? Ka na‘e ‘ikai ke fuoloa ‘a e fiefia ‘a ‘Ātama mo ‘Iví. Tau sio pe ko e hā hono ‘uhingá.