¿JASA stukil waxa wila ja bʼa dibujo it? Jaʼa ixuk winik waxa wila. Yeʼnle ja bʼajtan winiki soka bʼajtan ixuki. ¿Maʼ skʼulan? Jaʼa Dyosi. ¿Jas sbʼiʼil ja Dyosi? Sbʼiʼil Jyoba. Jaxa winik soka ixuk it aji sbʼiʼiluke Adán sok Eva.

Ja Jyobaji jachʼ skʼulan ja Adani: Slubʼu ja stsʼubʼil luʼumi soka jaw stojbʼes yiʼ ja skwerpoʼi, jun kwerpoʼal mey smul. Anto tixa sjuʼu yiʼ ja sniʼi, jachuk ja Adani jul sakʼanil ja bʼa luʼum it.

Jyoba chapanxani yuj jun yaʼtel ja Adani. Ja Adani ojni chʼak sleʼ yi sbʼiʼil spetsanil ja tuktukil tikʼe chanteʼi. Ja Adani bʼobʼta skʼela lek jitsan tyempo ja chante jumasaʼ bʼa jachuk oj yaʼ yi jun lekil sbʼiʼile. Yajni wan skʼulajel ja it ja Adani kʼe yil jun jas junuk ja bʼa chanteʼi. ¿Wan maʼ xa naʼa jasunkiluka?

Ja chante jumasaʼ naka ay smoje. Ja tsemeni ay smoj jaxa choji cha ayni smoja. Pe ja Adani stuchʼilni ay ekʼa. Anto ja Jyobaji ya och kan lek swayel ja Adani, sok ya eluk ja bʼa stsʼeʼeli jun sbʼakelil ja xaʼaxi. Soka xaʼax jaw ja Jyobaji skʼulan yiʼ jun ixuk ja Adani, ja ixuk it paxni xcheʼuma.

¡Ja weʼgo ja Adani jelxani gusto aya! ¡Jaxa Evaʼi jelni gustoʼaxi ja yajni yila ti aji bʼa jun tsamal kʼachinubʼ bʼa oj ajyuk sakʼan! Ja weʼgo ojxani bʼobʼ yil-e yuntikileʼa sok oj bʼobʼ ajyuke sakʼan gusto lek bʼa tolabida.

Ja Jyobaji wa skʼana ja Adán soka Eva aʼajyuke sakʼan bʼa tolabida. Ja Jyobaji wa skʼana ja yeʼnleʼi ayawe paxuk spetsanil ja Luʼumi jastal ja tsamal kʼachinubʼ bʼa Edeni. ¡Janekʼtoni gustoʼaxiye ja Adán soka Eva ja yajni spensarane yeʼn oj skʼuluke ja aʼtel jaw! ¿Oj maʼ yawi gusto ja weʼn oj koltanan ajyi bʼa yajel paxuk spetsanil ja Luʼumi jastal ja tsamal kʼachinubʼi? Pe ja tsamal sakʼanile ja Adán soka Evaʼi mi albʼi. La kiltikawil jas yuj.