Nganea 3: Munna Wa u Thoma na Musadzi
Ho fhambana mini kha itshi tshifanyiso? Ee, ndi vhathu vha re khatsho. Ndi munna na musadzi vha u thoma. Vho itwa nga nnyi? Nga Mudzimu. Dzina ḽawe ni a ḽi ḓivha? Ndi Yehova. Nahone munna na musadzi vha ḓa vha vhidzwa Adamu na Eva.
Yehova Mudzimu o ita Adamu ngaurali. O dzhia buse mavuni a vhumba muvhili wo fhelelaho ngaḽo, muvhili wa munna. Zwenezwo a vhudzulela ningoni ya munna, Adamu a tshila.
Yehova Mudzimu o fha Adamu mushumo wa u rina tshaka dzoṱhe dza zwipuka madzina. Khamusi Adamu o vha o no sedza zwipuka tshifhinga tshilapfu uri a kone u zwi khethela madzina avhuḓi zwoṱhe. Musi Adamu a tshi khou rina zwipuka madzina a thoma u vhona tshiṅwe tshithu. Ni a ḓivha uri yo vha i mini?
Zwipuka zwoṱhe zwo vha zwi na dzikhonani. Ho vha hu na nḓou dza vhanna na dza vhasadzi, na ndau dza vhanna na dza vhasadzi. Fhedzi Adamu o vha a si na khonani yawe. Ngauralo Yehova a ita uri Adamu a eḓele khofhe khulu, a bvisa luvhabvu khae. A tshi shumisa ulu luvhabvu, Yehova a itela Adamu musadzi wawe.
Adamu o vha o takala hani zwino! Nahone humbulani uri Eva o fanela u vha o takala hani nge a vhewa tsimuni yo nakaho uri a dzule khayo! Zwino vho vha vha tshi nga vha na vhana.
Yehova o ṱoḓa uri Adamu na Eva vha tshile nga hu sa fheli. O ṱoḓa uri vha ite uri ḽifhasi ḽoṱhe ḽi nake u nga tsimu ya Edeni. Vho fanela u vha vho takala hani musi vha tshi humbula nga ha u ita izwi! Naa na inwi no vha ni tshi ḓo vha no funa u ṱanganela kha u ita uri ḽifhasi ḽi vhe tsimu ya u naka? Fhedzi dakalo ḽa Adamu na Eva a ḽo ngo dzulesa. Kha ri wane uri ndi ngani.
Psalme ya 83:18; Genesi 1:26-31; 2:7-25.
Mbudziso
- Tshifanyiso tshi re kha Nganea 3 tsho fhambana hani na tshifanyiso tshi re kha Nganea 2?
- Ndi nnyi we a ita munna wa u thoma, nahone dzina ḽa onoyo munna ndi nnyi?
- Mudzimu o ṋea Adamu mushumo ufhio?
- Ndi ngani Mudzimu o ita uri Adamu a eḓele khofhe khulu?
- Adamu na Eva vho vha vha tshi ḓo tshila tshifhinga tshingafhani, nahone Yehova o vha a tshi ṱoḓa uri vha ite mushumo ufhio?
Mbudziso dzo engedzeaho
- Vhalani Psalme ya 83:18.
Dzina ḽa Mudzimu ndi nnyi, nahone vhuimo hawe ho khetheaho ha kha ḽifhasi ndi vhufhio? (Yer. 16:21; Dan. 4:17)
- Vhalani Genesi 1:26-31.
Mudzimu o guma nga u sika mini nga ḓuvha ḽa vhurathi, nahone yeneyo tsiko yo vha yo fhambana hani na zwipuka? (Gen. 1:26)
Ndi ndugiselelo ifhio ye Yehova a i itela vhathu na zwipuka? (Gen. 1:30)
- Vhalani Genesi 2:7-25.
Mushumo wa Adamu wa u rina zwipuka madzina wo vha u tshi katela na mini? (Gen. 2:19)
Genesi 2:24 i ri thusa hani u pfesesa mavhonele a Yehova a mbingano, u fhandekana, na u ṱalana? (Mat. 19:4-6, 9)