ANO an nahidugang hini nga retrato? Oo, may-ada na ini mga tawo. Hira an siyahan nga lalaki ngan babaye. Hin-o an naglarang ha ira? An Dios. Maaram ka ba kon ano an ngaran han Dios? Oo, hi Jehova. Ngan an lalaki ngan babaye gintawag nga Adan ngan Eva.

Paonan-o ginlarang ni Jehova nga Dios hi Adan? Nagkuha hiya hin tapotapo tikang ha tuna ngan pinaagi hito ginporma niya an hingpit nga lawas—lawas han lalaki. Katapos, ginhuypan han Dios an irong ni Adan, ngan nabuhi hiya.

May-ada ginpabuhat hi Jehova nga Dios kan Adan. Ginsugo niya hi Adan nga ngaranan an ngatanan nga hayop. Posible nga maiha nga gin-inobserbahan ni Adan an mga hayop basi makapili hin maopay gud nga ngaran para ha tagsa hito. Samtang ginngangaranan niya an mga hayop, may-ada hiya naobserbahan. Maaram ka ba kon ano ito?

An ngatanan nga hayop may-ada padis. May-ada tatay nga elepante ngan nanay nga elepante, may-ada tatay nga leon ngan nanay nga leon. Kondi hi Adan waray padis. Salit ginpakaturog ni Jehova hi Adan hin hilarom, ngan ginkuha an usa nga gusok ha iya kagiliran. Pinaagi hito nga gusok naghimo hi Jehova hin babaye para kan Adan, ngan nagin asawa niya ito.

Nagin malipayon gud hi Adan! Ngan hunahunaa an kalipay ni Eva tungod kay aada hiya hito nga makaruruyag nga hardin! Puydi na hira magkaada hin mga anak ngan urosa nga magkinabuhi nga malipayon.

Karuyag ni Jehova nga mabuhi ha kadayonan hira Adan ngan Eva. Karuyag niya nga atamanon nira an bug-os nga tuna basi magin makaruruyag gud ito sugad han hardin han Eden. Sigurado nga malipayon gud hira Adan ngan Eva han ginhunahuna nira an pagbuhat hini! Kon nakadto ka, karuyag mo ba bumulig ha pagpaopay han tuna? Kondi, waray mag-iha an kalipay nira Adan ngan Eva. Aton kitaon kon kay ano.