TRAEM luk wanem samting i stap hapen naoia. God i ronemaot Adam mo Iv long naesfala garen ya blong Iden. ?Yu save from wanem?

Hemia from we tufala i mekem wan samting we i nogud tumas. Ale, Jeova i panisim tufala. ?Yu save wanem nogud samting we Adam mo Iv i mekem?

Tufala i mekem samting we God i bin talem long tufala se tufala i no mas mekem. God i bin talem se tufala i save kakae frut blong olgeta tri long garen. Be i gat wan tri nomo we tufala i no mas kakae frut blong hem. Sipos tufala i kakae, bambae tufala i mas ded. Hem i blokem tri ya se i blong hem nomo. Mo yumi save se i no stret blong tekem wan samting we i blong narafala man. ?Ale, wanem i hapen?

Wan dei, taem Iv i stap hem wan long garen, wan snek i toktok long hem. !Tingbaot samting ya! Snek ya i talem long Iv blong kakae frut blong tri ya we God i putum tabu long hem. Be, taem Jeova i wokem ol snek, hem i no givim paoa long olgeta blong toktok. Taswe, i mas wan narafala man we i mekem snek ya i toktok. ?Hu i mekem samting ya?

Hemia i no Adam. Man ya we i mekem samting ya i mas wan long ol spirit man we Jeova i wokem bifo we hem i wokem wol. Ol man ya oli ol enjel, mo yumi no save luk olgeta. Wan long ol enjel ya i kam flas long tingting blong hem. Nao hem i wantem kam olsem God mo bos long ol narafala samting. Mo hem i wantem se ol man oli obei long hem, i no long Jeova. Enjel ya nao i mekem snek ya i toktok.

Enjel ya i trikim Iv. Hem i talem long Iv se, sipos hem i kakae frut ya, bambae hem i save kam olsem God. Iv i trastem hem, ale, hem i kakae, mo Adam tu i kakae. Tufala i no moa obei long God, taswe tufala i lusum naesfala hom blong tufala.

Be God bambae i mekem se ful wol i kam wan naesfala ples bakegen, olsem garen blong Iden ya. Bambae yumi luk olsem wanem yu save joen long wok ya. Be fastaem, bambae yumi luk wanem i bin hapen long Adam mo Iv.

Jenesis 2:16, 17; 3:1-13, 24; Revelesen 12:9.