Maana 4nan

Mun na u bɔnɛna u ka sigiyɔrɔ la?

E K’A lajɛ fɛn min kɛra sisan. Hadama ni Hawa gɛnna ka bɔ Edɛn nakɔ cɛɲumanba kɔnɔ. I b’a dɔn mun na wa?

Hadama ni Hawa ye kojuguba dɔ de kɛ. O kama, Jehova ye u ɲangi. I b’a dɔn u ye kojugu min kɛ wa?

U ye ko dɔ de kɛ, Ala tun ko u kana min kɛ. Ala y’a fɔ u ye k’u bɛ se ka nakotu la jiridenw dun. Nka, jiri kelen tun bɛ yen, Ala ko u kana o den dun, ko ni u ye o dun, u bɛna sa. Ala tun ye o jiri mara, ka o kɛ a yɛrɛ de ta ye. An b’a dɔn ko a man ɲi ka walifɛn ta. Tiɲɛ tɛ? Mun dun kɛra?

Don dɔ la, k’a sɔrɔ mɔgɔ si tun tɛ Hawa kɛrɛfɛ nakɔ kɔnɔ, sa dɔ kumana a fɛ. Sa ka kuma mɔgɔ fɛ, e m’a dɔn o ye kabako ye! Ala y’a fɔ Hadama ni Hawa ye k’u kana jiriden min dun, sa y’a fɔ Hawa ye ko a ka o de dun. Ala ye saw da tuma min na, a ma u da walisa u ka se ka kuma. O la sa, kɔrɔ kelen dɔrɔn de tun bɛ o la. Dɔ de y’a kɛ sa ka kuma. O dun tun bɛ se ka kɛ jɔni ye?

Hadama tun tɛ. O la sa, Jehova ye fɛn minnu da waati jan sani a ka dugukolo da, a ka kan ka kɛ olu dɔ la kelen de ye. O fɛnw ye mɛlɛkɛw ye. An tɛ se k’olu ye. O mɛlɛkɛw dɔ la kelen de kɛra kuncɛba ye. A y’a miiri ko ale ka kan ka kɛ kuntigi ye i n’a fɔ Ala. A tun b’a fɛ Hadama ni Hawa ka ale de ka kuma mɛn. A tun t’a fɛ u ka Jehova ka kuma mɛn. O mɛlɛkɛ de y’a kɛ sa kumana.

O mɛlɛkɛ sera ka Hawa lafili. O mɛlɛkɛ y’a fɔ Hawa ye ko ni a ye jiriden dun, a bɛ kɛ i ko Ala. Hawa dara o la.O kosɔn, a ye jiriden dun. Hadama fana y’a dun. Hadama ni Hawa ma Ala ka kuma mɛn. O de y’a to u bɔnɛna u ka sigiyɔrɔ cɛɲumanba la.

Nka, don dɔ la, Ala bɛna dugukolo bɛɛ cɛɲɛ ka a kɛ i ko Edɛn nakɔ. E bɛ se ka i sen don o baara la cogo min na, an bɛna o ye kɔfɛ. Nka, an k’a lajɛ sisan, ko min ye Hadama ni Hawa sɔrɔ.

Jenɛse 2:16, 17; 3:1-13, 24; Jirali 12:9.