ANNOU vwar ki ti arive aprezan. Adan ek Ev i ganny retire dan sa zoli zarden. Ou konnen akoz?

Akoz zot ti’n fer en keksoz ki ti tre mal. Alor Zeova pe pini zot. Eski ou konnen kwa sa keksoz mal ki zot ti fer?

Zot ti fer en keksoz ki Bondye ti dir zot pa fer. Bondye ti permet zot pour manz fri tou pye dibwa dan zarden. Me ti annan en sel pye dibwa ki zot pa ti kapab kas son fri. Si zot ti manz son fri zot ti pou mor. Bondye ti rezerv sa pye dibwa pour li. Nou konnen ki i mal pour pran en keksoz ki pa pour nou. Me ki ti arive?

En zour Ev ti li tousel dan Zarden. Ou konnen ki ti arive, en serpan ti koz avek li. I ti dir li manz fri dan sa pye dibwa ki Bondye ti dir zot pa manze. Kan Zeova ti kree serpan, i pa ti kree zot avek abilite pour koze. Alor ti bezwen annan en lot dimoun ki ti pe fer sa serpan koze. Lekel?

Pa ti Adan. Donk, ti bezwen enn parmi sa bann personnaz ki Bondye ti kree byen lontan avan ki i ti kree later. Sa se bann lanz, nou pa kapab vwar zot. Enn parmi sa bann lanz ti vin fyer. I ti panse ki i devret vin en sef parey Bondye. I ti oule ki dimoun i obei li plito ki obei Zeova. Se li ki ti fer sa serpan koze.

Sa lanz ti reisi tronp Ev. I ti asir li ki si i manz sa fri i pou vin parey Bondye. Ev ti krwar li. Alor i ti manze, e Adan osi. Alor Bondye ti retir zot dan sa zoli zarden akoz zot ti’n dezobei li.

Me en zour, Bondye pou fer later antye vin zoli parey zarden Edenn. Plitar ou pou aprann konman ou kapab ede pour fer later vin zoli. Me aprezan, annou vwar ki ti arive avek Adan ek Ev.