EMAÑAMÍNA mbaʼépa oikohína koʼág̃a. Adán ha Eva oñemosẽhína pe hardín de Edén porãitégui. Nde piko reikuaa mbaʼérepa?

Ojapohaguére hikuái peteĩ mbaʼe ivaietereíva. Ha upévare Jehová okastigahína chupekuéra. Ndépa reikuaa mbaʼépa ojapo Adán ha Eva?

Ojapo hikuái peteĩ mbaʼe Ñandejára heʼivaʼekue ani hag̃ua ojapo. Ñandejára heʼi chupekuéra ikatuha hoʼu umi yva oĩva pe hardínpe. Péro peteĩ yvyra mátagui heʼi chupekuéra ani hag̃ua hoʼu; hoʼúramo, omanovaʼerã hikuái. Upe yvyra máta haʼe oñongatu imbaʼerã. Ha jaikuaa ivaiha japoko pe ndahaʼéivare ñanembaʼe, ajépa? Ha mbaʼépa oiko?

Peteĩ día, oĩ jave Eva haʼeño pe hardínpe, peteĩ mbói oñeʼẽ chupe. Mbaʼe piko upéva! Heʼi Évape hoʼu hag̃ua pe yva Ñandejára heʼivaʼekue chupekuéra ani hag̃ua hoʼu. Ojapórõ guare umi mbói, Jehová ndojapoivaʼekue chupekuéra oñeʼẽ hag̃ua. Upéva heʼise oĩhague peteĩ omoñeʼẽva pe mbóipe. Mávapa rakaʼe upéva?

Ndahaʼéi Adán. Upévare haʼemantevaʼerã peteĩ persóna Jehová ojapovaʼekue are ojapo mboyve ko Yvy. Umíva haʼevaʼekue ánhel, ndaikatúiva jahecha. Ko ánhel katu oñemombaʼeguasuvaʼekue. Oñepyrũ opensa ikatuha ogoverna avei Ñandejáraicha ha ojejapovaʼerãha pe haʼe heʼíva, ojejaporangue Jehová heʼíva. Ko ánhel haʼe pe omoñeʼẽvaʼekue pe mbói.

Ko ánhel ikatuvaʼekue ombotavy Évape. Heʼírõ guare chupe haʼetaha Ñandejáraicha hoʼúrõ pe yva, Eva oguerovia. Upévare hoʼu pe yva, ha Adán hoʼu avei. Adán ha Eva odesovedese Ñandejárape, ha upévare oñemosẽ hikuái pe hóga porãitégui, haʼevaʼekue peteĩ hardín.

Péro, peteĩ árape Ñandejára omoporãitereíta opárupi ko Yvy, iporã haguéicha pe hardín de Edén. Upéi jahecháta mbaʼéichapa nde avei ikatu repartisipa upévape. Koʼág̃a jahechami mbaʼépa ojehu Adán ha Évape.