Kukwe kira 4

Ñobätä kä kwin nianinte kän

DRETA nakainkä mike ñärärä. Adán bätä Eva juantarita kä Edén ye bäre. ¿Ñobätä gare mäi?

Kukwe käme krubäte nuainbare kwetre. Yebätä Jehová tä mike ja ngie nuin. ¿Adán bätä Eva käkwe dre nuainbare gare mäi?

Ngöbö jondron ñäkäibare ye nuainbare kwetre. Kri ngwä kä bä nuäre te ye kwetadre kwetre niebare Ngöbökwe ietre. Akwa kri dati abokän ñaka ngwä kwetadre kwetre niebare kwe ietre; kwetadre kwetre angwane krütadre. Kri ye ñäkäibare ietre. Jondron jenena diandre jai ye käme gare nie, ¿ñan ererea? Akwa, ¿dre namani bare?

Eva nämene kaibe kä bä nuäre känti angwane, kulebra krati käkwe blitabare ben. ¡Töbike kukwe nebätä! Ngöbö kri ngwä ñäkäibare Evai ye namani kwetamana ie. Jehová ñaka kulebra ye sribebare blitakäre. Yebätä, ni mada käkwe kulebra mikani blite. ¿Ye abokän nire?

Ye ñaka Adán. Jehová jämi Kä tibien sribere känenkri nitre mada sribebare kwe; iti abokän käkwe ye nuainbare. Nitre ye angele ñaka raba tuin. Ángel ne ie ja namani ruin bäri ütiäte. Tö namani ja tuai gobrane Ngöbö erere bätä niara mikadre täte ie tö namani aune ñaka Jehová. Niarakwe kulebra mikani blite.

Ángel ne käkwe Eva ngökani. Eva käkwe kri ngwä kwetai angwane rabai Ngöbö erere niebare kwe ie, Eva käkwe ye mikani era jai. Yebätä kwetani kwe, aune Adán käkwe nuainbare erere arato. Adán bätä Eva käkwe ñaka Ngöbö mikani täte, yebätä kä bä nuäre nianinte kän.

Akwa Ngöbökwe Kä tibien jökrä sribeita bä nuäre kä Edén erere. Mä raba dre nuainne mikakäre nemen bare ye nikwe mikai gare jai ja känenkäre. Akwa, dre namani bare Adán bätä Eva yebätä ani mike gare jai.

Génesis 2:16, 17; 3:1-13, 24; Revelación 12:9.