IA VARA noho gauna mani oi itaia. Dirava ese Adamu bona Heva be Eden uma mai hairaina amo ia luludia. Ena badina oi diba, a?

Badina idia ese kerere bada herea idia karaia. Bona unai dainai Iehova ese idia ia panisia. Adamu bona Heva ese idia karaia kerere oi diba, a?

Dirava ia gwau do idia karaia lasi gauna ta idia karaia. Dirava ese idia ia hamaoroa uma gabuna dekenai idia gini au ibounai edia huahua idia ania diba. To Dirava ia gwau au tamona ena huahua do idia ania lasi, bema idia ania, do idia mase. Unai be Dirava ena au. Bona ita diba, tau ta ena gau ita abia kava be kerere, ani? Vadaeni, dahaka ia vara?

Dina ta Heva be uma dekenai sibona ia noho neganai, gaigai ta ese ia hereva henia. Mani unai oi laloa! Gaigai ese Heva ia hamaoroa Dirava ese ia taravatua au ena huahua do ia ania. To ita diba Iehova ese gaigai ia karaia neganai, idia hereva diba lasi. Unai dainai ita diba tau ta be gaigai ena uduna amo ia hereva. Unai tau be daika?

Ia be Adamu lasi. Unai dainai ia be Iehova ese tanobada ia do karaia lasi neganai, ia havaraia taudia ta. Idia be aneru, bona idia ita itaia diba lasi. Aneru ta ia hekokoroku bada. Ia laloa namona be ia danu ia lohia Dirava bamona. Bona ia ura taunimanima ese ia idia kamonai henia, to Iehova lasi. Unai aneru ena siahu amo gaigai ia hereva.

Unai aneru ese Heva ia koia. Heva ia hamaoroa bema huahua ia ania, Dirava bamona ai do ia lao, bona Heva ese unai ia abia dae. Unai dainai ia ania bona Adamu danu ia ania. Adamu bona Heva ese Dirava ena hereva idia kamonai lasi, unai dainai edia noho gabu hairaina idia haboioa.

To nega ta Dirava ese inai tanobada ibounai be hairai gabuna ai do ia halaoa, Eden umana bamona. Gabeai do ita diba, edena bamona unai gaukara oi durua diba. To, Adamu bona Heva dekenai ia vara gauna mani ita tahua.