GRAI n kaja ai a mu hpe shan glaw kau ai majaw re. Dai rai nna shan hpe Yehowa gaw ari jaw nga ai. Adam hte Ewa kaning re n kaja ai amu hpe galaw ai hpe nang chye a ni?

Karai Kasang hkum galaw mu, nga ai hpe shan galaw ma ai. Sun hta tu ai hpun ni a asi hpe sha lu ai. Raitimung hpun langai mi hta na asi chyawm gaw nsha lu ai. Sha jang si na re, nga nna Karai Kasang tsun tawn da ai. Dai hpun hpe Karai Kasang gaw shi a matu san tawn da ai.Masha ni hte seng ai arai hpe la yang shut ai lam anhte chye ga ai. Teng ai nre ni? Shing rai yang hpa byin a ni?

Lani mi hta sun kata kaw e, Ewa langai hkrai sha nga nga ai shaloi, lapu langai mi shi hte aga sa shaga ai. Myit yu u. Karai Kasang shan hpe hkum sha mu, ngu ai namsi hpe lapu gaw sha u, nga nna Ewa hpe sa tsun ai da. Lapu hpe Yehowa hpan da ai shaloi, aga chye shaga na hku nhpan da ai. Dai majaw lapu aga shaga wa hkra marai langai ngai shabyin ai rai na re. Kadai wa shabyin ai kun?

Adam nre ai. Dai majaw ginding aga hpe garai n galaw yang Yehowa galaw da ai ni kaw na marai langai ngai rai na re. Dai ni gaw lamu kasa ni rai nna, shanhte hpe anhte a myi hte nmu lu ai. Dai lamu kasa ni kaw na langai mi gaw, grai gumrawng gumtawng ai myit rawng wa ai. Ngai mung Krai Kasang zawn up hkang madu tai yang mai na re, nga nna myit wa ai. Yehowa a ga hpe masha ni madat na malai, shi a ga hpe mahtang madat shangun mayu ai. Lapu aga chye shaga wa hkra shabyin dat ai wa gaw dai lamu kasa wa nan re.

Ndai lamu kasa gaw Ewa hpe lu gunglau nu ai. Nang dai namsi hpe sha jang Karai Kasang hte maren tai wa na re, nga nna Ewa hpe tsun ai hte shi kam mat ai. Dai majaw shi sha nna, Adam mung sha lawm kau sai. Adam hte Ewa gaw Karai Kasang a ga hpe tawt lai kau ai majaw tsawm la ai shan a sun dum nta hpe shamat kau ma ai.

Raitimung lani mi hta e, ginding aga mahkra hpe Edin sun zawn tsawm htap nga hkra, Karai Kasang bai galaw ya na re. Ndai zawn galaw wa yang nanhte mung gara hku nna shang lawm lu na hpe hpang e anhte sharing la lu na re. Ya Adam hte Ewa gara hku byin mat wa ai hpe yu yu ga.