Ngewa ya 4: Nĩkĩ Maaisye Wĩkalo Woo
KWASISYA kĩla kĩendee kwĩkĩka vaa. Atamu na Eva nĩmeũlũngw’a mũũndanĩ mwanake wa Eteni. We nũũmanya nĩkĩ?
Kĩtumĩ nũndũ nĩmeekie ũndũ mũthũku mũno. Kwoou Yeova nũkũmasilĩla. We nĩwĩsĩ ũndũ mũthũku ũla Atamu na Eva meekie?
Meekie ũndũ Ngai wameĩte maikeke. Ngai ameie nĩmatonya kũya lĩu kuma mĩtĩnĩ ya mũũnda ũsu. Ĩndĩ wa mũtĩ ũmwe Ngai nĩwameie maikaye, nũndũ maya makakw’a. Mũtĩ ũsu waĩ wake e weka. Nĩtwĩsĩ kana kwosa kĩndũ kya mũndũ ũngĩ nĩ ĩvĩtyo, kana tyo twĩsĩ ũu? Yu-ĩ, kweekĩkie ata?
Mũthenya ũmwe Eva e weka mũũndanĩ, nzoka nĩyaneenie nake. Kwasũanĩa ũndũ ũsu! Yeeie Eva aye matunda ma mũtĩ ũla Ngai wameĩte maikaye. Ĩndĩ yĩla Yeova woombie nzoka ndaainenga ũtonyi wa kũneena. Kwoou veonany’a kana ve mũndũ ũngĩ ũla watumie nzoka ĩneena. We aĩ ũũ?
Ndaĩ Atamu. Kwa kĩtumi kĩu no nginya ethĩwe aĩ ũmwe wa syũmbe ila Yeova woombĩte tene mũno mbee wa kũmba nthĩ. Syũmbe isu nĩ alaĩka, na tũitonya kũmona. Mũlaĩka ũsu aĩ na mĩyono mingĩ. Ambĩĩie kũsũanĩa kana no nginya ethĩwe mũsumbĩ ta Ngai. Na nĩwendaa andũ mamwĩw’ae we vandũ va kũmwĩw’a Yeova. Ũsu nĩwe mũlaĩka ũla watumie nzoka ĩneena.
Mũlaĩka ũsu nĩwamũkengie Eva. Yĩla wamwĩie kana akekala ta Ngai aya ĩtunda, Eva nĩwaĩkĩĩie ũu. Kwoou nĩwaĩye, na Atamu o nake aya. Atamu na Eva nĩmaleile kũmwĩw’a Ngai, na kwa kĩtumi kĩu maasya wĩkalo woo wa mũũnda mwanake.
Ĩndĩ mũthenya ũmwe Ngai akatuma nthĩ yonthe yaĩla ta mũũnda wa Eteni. Ĩtina tũkeemanyĩsya ũndũ ũtonya kwĩthĩwa na kĩanda nthĩnĩ wa kũmyaĩlya yĩkale ũu. Ekai ĩndĩ yu twone ũndũ kweethĩiwe ĩũlũ wa Atamu na Eva.
Mwambĩlĩlyo 2:16, 17; 3:1-13, 24; Ũvuan’yo 12:9.
Makũlyo
- Vaa visanĩ, nĩ kyaũ kĩendee kwĩkĩka kwa Atamu na Eva?
- Yeova amasilĩile nĩkĩ?
- Nzoka yamwĩie Eva ata?
- Nũũ watumie nzoka ĩneena na Eva?
- Nĩkĩ Atamu na Eva maaisye wĩkalo woo wa Valatiso?
Makũlyo ma kwongeleela
- Soma Mwambĩlĩlyo 2:16, 17 na 3:1-13,24.
Ĩkũlyo yĩla nzoka yakũlilye Eva yaetie ata ũvoo ũte waw’o kwelekela Yeova? (Mwa. 3:1-5; 1 Yoa. 5:3)
Nĩkĩ ngelekany’o ya Eva nĩ ũkany’o kwitũ? (Avi. 4:8; Yak. 1:14, 15; 1 Yoa. 2: 16)
Nĩ kwa nzĩa yĩva Atamu na Eva maleile kwĩtĩkĩla mavĩtyo ala maumanie na meko moo? (Mwa. 3:12, 13)
Akeluvi ala maiĩtwe wumĩlonĩ wa syũa mũũndanĩ wa Eteni malũlũmĩĩilye ata ũsumbĩ mũnene wa Yeova? (Mwa. 3:24)
- Soma Ũvuan’yo 12:9.
Satani atonyete ata kwasya andũ matie ũsumbĩ wa Ngai? (1 Yoa. 5:19)
