MA NAKAANAW kʼaru yookebʼ xkʼulbʼal laj Adan ut xʼEva? Yookebʼ chi isiik saʼ li chʼinaʼusil naʼajej. Ma nakaanaw kʼaʼut?

Xbʼaan naq keʼmaakobʼk chiru li Jehobʼa joʼkan naq yookebʼ xtojbʼal xmaak. Ma nakaanaw kʼaru keʼxbʼaanu?

Inkʼaʼ keʼabʼink chiru li Yos. Li Yos kixye rehebʼ naq naru teʼxtzaka ruhebʼ li cheʼ li wank saʼ li chʼinaʼusil naʼajej. Abʼan keyeheʼk re naq jun ajwiʼ ru li cheʼ inkʼaʼ teʼxtzaka, re naq inkʼaʼ teʼkamq. Li cheʼ aʼin re li Yos. Laaʼo naqanaw naq moko us ta xchapbʼal li maawaʼ qe. Abʼan, kʼaru keʼxbʼaanu laj Adan ut xʼEva?

Saʼ jun kutan naq li xʼEva wank xjunes saʼ li naʼajej Eden, jun li kʼantiʼ kiʼaatinank re. Li kʼantiʼ kixye re xʼEva naq tixlow ru li cheʼ, li kixye li Yos naq inkʼaʼ teʼxlow. Abʼan, naq li Yos kixyoobʼtesihebʼ li kʼantiʼ moko kixbʼaanu ta re naq teʼaatinaq. Joʼkan naq, ani tawiʼ kikʼehok re chi aatinak li kʼantiʼ?

Moko laj Adan ta kibʼaanunk re. Aʼan bʼan jun rehebʼ li anjel, li kixyoobʼtesi li Yos naq toj maajiʼ naxyiibʼ chaq li Ruuchichʼochʼ. Joʼkan naq li anjel aʼin kixnimobʼresi ribʼ. Kiraj jolomink joʼ li Yos re naq ebʼ li poyanam teʼpaabʼanq re ut inkʼaʼ chik teʼxpaabʼ li Jehobʼa. Li anjel aʼin kixkʼe chi aatinak li kʼantiʼ.

Li anjel aʼin kixbʼalaqʼi xʼEva naq kixye re, naq chanchanaq li Yos wi tixlow ru li cheʼ. Laj Adan ut li xʼEva keʼxpaabʼ re li anjel aʼin ut keʼxqʼet Raatin li Yos, joʼkan naq keʼisiik saʼ li chʼinaʼusil naʼajej.

Abʼan twulaq xqʼehil naq li Yos tixyiibʼ chixjunil li Ruuchichʼochʼ joʼ li chʼinaʼusil naʼajej Eden. Moqon chik, tqil chanru tatruuq chi tzʼaqonq saʼ li kʼanjel aʼin. Anaqwan qilaq, kʼaru keʼxkʼul laj Adan ut xʼEva.