PANO akimona kibena kumwekana. Ba Adama ne Evwa bebafumyamo mu bujimi bwanengela bwa Edena. Nanchi wayuka kyo bebafumishishemo nyi?

Ke na mambo a kuba’mba baubile kintu kyatama. Onkao mambo, Yehoba wibakambwile. Abya wayuka kintu kyatama kyaubile ba Adama ne Evwa nyi?

Baubile kintu Lesa kyo ebakambizhe kubula kuba. Lesa wibabujile kuja ku bichi byonse bya mu bujimi. Bino Lesa wibakambizhe kubula kujako ku kichi kimo, mambo umvwe bajako bakonsheshe kufwa. Akya kichi kyajinga kyanji. Kabiji twayuka namba kyatama kutola kintu kyabula kyobe, ke ibyo nenyi? Pano ki ka kyamwekele?

Juba jimo, Evwa byo ajinga bunke mu bujimi, muloolo wisambile nanji. Akikilangulukepotu! Muloolo wamwambijile Evwa kuja ku kyonkakya kichi Lesa kyo ebakambizhe kubula kujako. Yehoba byo alengele miloolo kechi wiilengele mu jishinda ja kuba’mba yakonsha kwamba ne. Kino kibena kumwesha’mba kwajinga muntu umo walengejile amba muloolo ambe. Uno muntu wajinga ñanyi?

Kechi wajinga Adama ne. Onkao mambo wajinga umo wa pa bantu bo alengele Yehoba kala kene saka akyangye kulenga ntanda. Bano bantu ke bamalaika, kabiji kechi twakonsha kwibamona ne. Uno malaika umo waishile kwikala na muchima wa bwitote. Watendekele kulanguluka’mba naye wakonsha kwikala kalama byonkatu biji Lesa. Kabiji wakebelenga bantu kumukokela kukila kukokela Yehoba. Ye malaika walengejile muloolo kwamba.

Uno muloolo wakonsheshe kumujimbaika Evwa. Byo amwambijile Evwa amba ukekala nobe Lesa umvwe waja ku kichi, Evwa naye ne muchima kolo. Onkao mambo Evwa wajileko, ne Adama naye wajileko. Ba Adama ne Evwa basatukijile Lesa, o ene mambo o babujijile kutwajijila kwikala mu muzhi wabo wanengela.

Pano bino juba jimo Lesa ukawamisha ntanda yonse kwikala byonka byajinga bujimi bwa Edena. Tukafunda ne obewa byo wakonsha kwikalamo na lubaji mu kuwamisha ino ntanda. Pano akitwaya tumone kyamwekejile ba Adama ne Evwa.