ပူ ၄
ဘၣ်မနုၤအဃိ အဝဲသ့ၣ်အဟံၣ်အဃီ ဘၣ်လီၤမၢ်တ့ၢ်ဝဲ အဂ့ၢ်
ခဲအံၤတၢ်မၤအသးဒ်လဲၣ်န့ၣ် ကွၢ်တက့ၢ်. အၤဒၣ်ဒီးအံၣ်အု ဘၣ်တၢ်နီၣ်ဟးထီၣ်အီၤလၢ ဧ့ၤဒ့ၣ်တၤသၣ်အလီၢ်ဃံလၤအပူၤန့ၣ်လီၤ. ဘၣ်မနုၤအဃိလဲၣ် နသ့ၣ်ညါဧါ.
မၤဝဲသ့ၣ် တၢ်မၤအၢအၢသီသီတခါ အဃိလီၤ. လၢတၢ်အံၤအဃိ ယဟိဝၤစံၣ်ညီၣ်အဝဲသ့ၣ်လီၤ. အၤဒၣ်ဒီးအံၣ်အု မၤတ့ၢ်ဝဲတၢ်မၤအအၢအသီမနုၤလဲၣ်, နသ့ၣ်ညါဧါ.
အဝဲသ့ၣ်မၤတၢ်လၢ ယွၤစံးမၤတဂ့ၤန့ၣ်လီၤ. ယွၤစံးတ့ၢ်အဝဲသ့ၣ် သ့ၣ်တဖၣ်လၢအအိၣ်လၢ တၤသၣ်အလီၢ်ပူၤ အသၣ်တဖၣ်န့ၣ် အဝဲသ့ၣ်အီၣ်ဝဲသ့လီၤ. ဘၣ်ဆၣ်သနာ်က့ သ့ၣ်တထူၣ်အတၤသၣ်န့ၣ် တဘၣ်အီၣ်ဝဲသ့ၣ်ဘၣ်. မ့ၢ်အီၣ်န့ၣ် ကသံဝဲသ့ၣ်လီၤ. ယွၤပာ်လီၤဆီသ့ၣ်ထူၣ်အံၤ လၢအဂီၢ်လီၤ. တၢ်ဖိတၢ်လံၤလၢအမ့ၢ် ပှၤအတၢ်န့ၣ် ပတကြၢးဟံးန့ၢ်ဘၣ်န့ၣ် ပသ့ၣ်ညါပဝဲခဲလၢာ်လီၤ, တမ့ၢ်ဘၣ်ဧါ. ဂ့ၤလံ, ခဲအံၤတၢ်ကဲထီၣ်ဒ်လဲၣ်.
ဘၣ်မုၢ်တနံၤ, ဖဲအံၣ်အုအိၣ်ထဲတဂၤဧိၤအခါန့ၣ် ဂုၢ်တဘိဟဲကတိၤတၢ်ဒီးအီၤလီၤ. ဆိကမိၣ်ကွၢ်တဘီ. ဂုၢ်စံးအံၣ်အုလၢကအီၣ် သ့ၣ်သၣ်လၢယွၤစံးအီၣ်တဂ့ၤ န့ၣ်လီၤ. ဖဲယွၤတ့လီၤဂုၢ်အခါ တတ့လီၤဝဲလၢ ကတိၤတၢ်ကသ့အဂီၢ်ဘၣ်. လၢတၢ်န့ၣ်အဃိ ဂုၢ်ကတိၤတၢ်သ့န့ၣ် ကဘၣ်မ့ၢ်ဝဲဒၣ် ပှၤတဂၤဂၤ အတၢ်မၤန့ၣ်လီၤ. မတၤမၤတၢ်ဒ်န့ၣ်လဲၣ်.
အၤဒၣ်ဒုတမ့ၢ်ဘၣ်. လၢတၢ်န့ၣ်အဃိ ကဘၣ်မ့ၢ်ပှၤတဂၤဂၤ လၢတချုးယွၤတ့လီၤဟီၣ်ခိၣ်ဒံးဘၣ်အခါ ပှၤလၢအတ့လီၤတ့ၢ်တဖၣ်အကျါ န့ၣ်လီၤ. ပှၤတဖၣ်အံၤ မ့ၢ်မူခိၣ်ကလူးတဖၣ်ဒီး ပထံၣ်အဝဲသ့ၣ်လၢပမဲာ်တသ့ဘၣ်. လၢမူခိၣ်ကလူးတဖၣ်အံၤအကျါ တဂၤန့ၣ် ပာ်ကဖၢလၢထီၣ်အသးလီၤ. ဆိကမိၣ်လီၤက့ၤအသးလၢ အကြၢးပၢတၢ်ဒ်သိး ကစၢ်ယွၤလီၤ. ဝံၤဒီး, လၢပှၤကဒိကနၢ်ကစၢ်ယွၤအတၢ်ကတိၤအလီၢ်န့ၣ် အဲၣ်ဒိးဝဲလၢ ပှၤကဒိကနၣ် အတၢ်ကတိၤန့ၣ်လီၤ. ပှၤလၢအမၤဂုၢ်ကကတိၤတၢ်န့ၣ် အဝဲဒၣ်လီၤသၢၣ်.
မူခိၣ်ကလူးဝဲအံၤ လီန့ၢ်အံၣ်အုလီၤ. စံးဝဲအံၣ်အုလၢ မ့ၢ်အီၣ်တၤသၣ်အဝဲအံၤ ကဟဲကဲထီၣ်ဒ်သိးယွၤ, ဒီးအံၣ်အုန့ၣ် နာ်ဝဲဒၣ်လီၤ. တၢ်န့ၣ်အဃိ အံၣ်အုအီၣ်ဝဲဒၣ်လီၤ. အၤဒၣ်စ့ၢ်ကီးအီၣ်ထွဲဝဲလီၤ. အၤဒၣ်ဒီးအံၣ်အုန့ၣ် တဒိကနၢ်ယွၤ အတၢ်ကတိၤအဃိ အဝဲသ့ၣ်ဘၣ်ပာ်တ့ၢ်အဟံၣ် ဃံလၤဖိန့ၣ်လီၤသၢၣ်.
ဘၣ်ဆၣ်သနာ်က့ မုၢ်အိၣ်ဝဲတနံၤလၢ ယွၤကမၤကဲထီၣ်ဟီၣ်ခိၣ်ဒီဘ့ၣ်ညါ ကဃံလၤဒ် ဧ့ၤဒ့ၣ်တၤသၣ်အလီၢ်အသိးလီၤ. ဖဲတၢ်မၤအီၤဒ်န့ၣ်အခါ သုဝဲစ့ၢ်ကီး သုနုာ်လီၤမၤအီၤသ့အဂၢ်န့ၣ် လၢခံသုကသ့ၣ်ညါဘၣ်လီၤ. ဘၣ်ဆၣ် ခဲအံၤ တၢ်မၤအသးလၢ အၤဒၣ်ဒီးအံၣ်အု ဒ်လဲၣ်န့ၣ် ပကကွၢ်သကိးတက့ၢ်.
