TALA diambu dibwidi owau. Adami yo Eva mu vaikiswa bena muna mpatu ambote ya Edene. Ng’ozeye ekuma?

Diambu diambi kikilu bavangidi. Ikuma, o Yave ubatumbidi. Ng’ozeye e mbi bavanga?

Bavanga dina kabavovesa Nzambi vo ke bavangi dio ko. Nzambi wabavovesa vo badia kwau bundu ya nti mina muna mpatu. Kansi, vena ye nti mosi kabasim’o Nzambi balembi wo dia, benkwa fwa. E nti wowo wa yandi kibeni. Tuzeye wo vo ke diambote ko dia bonga má kiangani. Adieyi diabwa?

Lumbu kimosi vav’o Eva kakala yandi amosi muna mpatu, o nioka wizidi kumvovesa. Se badiki e mpila moko kiakala. Wamvovesa vo kadia e bundu kia nti kina kabakanikina Nzambi vo ke badie ko. Vav’o Yave kavanga nioka kabavanga ye wisa kia vova ko. Disongele vo muntu akaka wavovelanga muna nioka. Nani i muntu ndioyo?

Ke Adami ko. Mosi muna wantu kavang’o Yave una kavangidi ntoto ko. wantu awaya i mbasi, katulendi kubamona ko. Mosi muna mbasi awaya wakituka se nkwa lulendo. Wayantik’o banza vo wafwana kwandi yala nze Nzambi. Wazola vo wantu banlemvokela ke mu Yave ko. Yandi i mbasi wavovela muna nioka.

Mbasi ndioyo walenda vunginika Eva. Wamvovesa vo okala nze Nzambi ovo odidi bundu kia nti. Eva wakwikila muna mvovo miandi. Ikuma, wadia bundu kia nti yo Adami kumosi. Adami yo Eva i nkolamena bakolamena Nzambi. Muna kuma kiaki, bavidisa mpatu au ambote.

Kansi, vena ye lumbu kina Nzambi kekitula nza yawonso se fulu kiambote kikilu nze mpatu a Edene. I bosi tusinga longoka una tulenda kadila kumosi mu kitula ntoto se wambote. Owau, yambula twawa mana mabwila Adami yo Eva.