Asisile Yini Eyima Aku Avizuri
A’DIKO 4
Asisile Yini Eyima Aku Avizuri
MI NE nga e’yo di ’i ’yepi sawa ’disi ’di. ’Ba Adamu piki ofu Eva be engazu amvu onyiru Edeni ni ma alea risi amve. Mi ni asisile ni ra ya?
A’dusikuni ’yeki afa azi onzi tu ’dinile ni. Yehovani di ani eyini panga fe. Mi ni afa onzi Adamu pini ’ye Eva beri ra ya?
A’dusiku ’yeki afa azi Munguni ndra ’yo ma ’yeki ku ni. Mungu ’yo ndra kini ecoki pati amvu ’da ma alea ’diyi ma efi nya ra. Te Mungu ’yo ndra ma nyaki pati aluni ma efi ku, kaki ndra nya ra eyi ndra nga dra ra. Mba ndra pati nde ma ta afa ini le. Ama niki ni ’bani ’ba azi ma afa ’duzu ri onzi, ’dini ku ya? A’du afa ’ye di ndra ’i ni ya?
O’du azini ndra alu Eva ni ovuzu amvu ’da ma alea a’dule ria, ori nze ndra e’yo eribe. Mi ega nga e’yo afa ’di ma dria! ’Yo Eva ma nya pati ndra Munguni ’yo ma nyaki efini ku ri ma efi. Ndra Yehovani ori yi o’baria, ede ndra eyi yini ecozu e’yo nzezu ’dini ku. ’Di ma efi kini ‘ba azini fe ndra ori ’dani e’yo nzezu ni. A’di fe ndra ni ya?
Ovuni ndra Adamu ’i ku. Asisile ’disi ’da eco ndra ovu ’ba ndra Yehovani o’ba drio erini nga nyaku o’bazu ku risi ’diyi ma azi. ’Ba ’dayi malaika yi, azini ama ecoki eyi ne ku. Malaika alu ’di eca ndra afu be tu. E’do e’yo ega kini le ta ima ovu opiru ekile Mungu le. Azini le ndra ’ba ma eriki ima ti ’bani Yehova ma ti erizu ri ma paria. Eri Malaika ndra fepi ori ’da ni e’yo nzezu ri ’i.
Malaika ’di ole ndra Eva ni ra. Erini ’yozu erini ka pati efi ’da nya eri nga eca Mungu le risi, Eva a’i ndra ra. Ani nga pati efi nde nya ra, Adamu nga vini ndra nya indi. Adamu pi gaki di ndra Eva be Mungu ma ti eriko si, ’di di asisile yini eyi ma aku amvu ndrizaruri ma aleari avizu ri ’i.
Te ewu azi dria ’dele nisi, Munguni nga fe ’ba ma ede nyaku ’di dria onyiru ekile amvu ndra Edenia rile. Dria ’dele ama nga mu e’yo oni mi eco ovu ojataa ’di ma alea ci ngoni ngoni ya ri ma dria. Te di sawa ’disi, le ama ma neki nga a’du afa ’ye ndra ’i Adamu pi ma rua Eva be niari.
