Chihande 4

Chalingishile Numba Vajimbalise Limbo Lyavo

TALA jino vyuma vili nakusoloka. Alama naEve vali nakuvahanga mumilemba yakukupuka yaEtene. Unatachikiza chuma vanakuvahangila tahi?

Mwomwo valingile chuma chachipi chikuma. Jino Yehova anakuvazangamisa. Unejiva chuma chachipi valingile vaAlama naEve tahi?

Valingile chuma avakanyishile Kalunga. Kalunga avetavishile kulya kumitondo yamumilemba. Oloze kwapwile mutondo umwe kaha avakanyishile Kalunga kulya, kuchina navakafwa. Mutondo kana wapwile waikiye kaha. Kaha twatachikiza ngwetu chakuhenga kumbata chuma chambala, nyi chiku? Chamwaza, jino chuma chika chasolokele?

Likumbi limwe linoka ahanjikile kuli Eve omu apwile uka wenyi mumilemba. Achishinganyeke hachuma kana! Linoka alwezele Eve kulya kumutondo avakanyishile Kalunga. Yehova hakutenga manoka kavatengele mangana vakahanjikengako. Echi chili nakulumbununa nge kwapwile mutu alingishile linoka ahanjike. Iya venyou?

Keshi Alamako. Shikaho atela kupwa umwe wavaze vatu atengele Yehova shimbu kanda achitenge mavu. Vatu kana vapwa vangelo, kaha katweshi kuhasa kuvamonako. Kangelo kanou aputukile kulipambula. Aputukile kushinganyeka ngwenyi nayikiye akapwe mwangana chiwenya Kalunga. Kaha asakile vatu vamwononokenga ikiye muchishishisa chakwononoka Yehova. Kangelo kanou ikiye alingishile linoka numba ahanjike.

Ou kangelo ongele Eve. Omu amulwezele ngwenyi hakulya kumuhako kana mwakalumuka nakupwa nge Kalunga, ikiye etavilile. Alile, naAlama nawa alile. Alama naEve kavononokele Kalungako, shikaho vajimbalishile limbo lyavo lyamilemba yamwaza.

Oloze likumbi limwe, Kalunga mwakawahisa mavu osena kupwa amwaza ngana mwamilemba yaEtene. Kanda numba tushimutwile munaukahasa nayove kwazana mumilimo kana. Oloze oholyapwa, tuchiwanenu vyuma vyasolokele kuli Alama naEve.

Kuputuka 2:16, 17; 3:1-13, 24; Kusoloka 12:9.