MPANJI 4

Chaletesheli Kujimbesha Mukala Wawu

TALAÑA chuma chinakumwekana hanu. Adama naEvu anayifumishi dehi mwitempa dadiwahi daEdeni. Wuneluki muloña waweni wuyayifumishililimu?

Muloña akoñeli chuma chatama nankashi. Dichi Yehova nakuyibabesha. Wuneluki chuma chatama chiyakoñeliwu Adama naEvu?

Akoñeli chuma chatama chayilekesheliyi Nzambi. Nzambi wayilejeli nindi anatweshi kudya nyikabu yakunyitondu yamwitempa. Ilaña kumutondu wumu Nzambi wahosheli nindi bayi akadya kwoku, neyi adyaku akufwa. Nzambi wawuhembeli wuna mutondu nindi windi. Nawa tweluka netu kunona chuma chamuntu wacheñi chatama, hidimuku? Hanu dinu, chumanyi chamwekeni?

Ifuku dimu, chadiñayi Evu nkawindi mwitempa, kapela wahosheli nindi. Chitoñojoki! Kapela wamulejeli Evu kudya mukabu wakumutondu wayilekesheliyi Nzambi kudya. Yehova chayileñeliyi atupela, hayileñeli nindi ahosheñaku. Ichi chinakumwekesha nawu kudi muntu wumu wakojejeli kapela kuhosha. Wadiñanyi yenowu?

Hadiña Adamaku. Watela kwikala wumu hakachi kawantu owu Yehova aleñeliyi henohu kanda yaleñi nimaseki. Antu wenowu diwu añelu, nawa hitwayimonañaku. Kañelu wumu waswejeli kudinka wanta. Watachikili kutoñojoka nindi niyena watela kwikala mwanta neyi chochekalayi Nzambi. Nawa wakeñeleña antu amwovwahileña yena chatela kumwovwahila Yehova. Diyi kañelu wakojejeli kapela kuhosha.

Iwu kañelu watwesheli kumudimbeka Evu. Chamulejeliyi mumbanda nindi wukwikala neyi chochekalayi Nzambi wutiya tuhu yadyaku kuniwu mukabu, mumbanda wetejeli. Wadiliku niAdama niyena nawa wadyili. Adama naEvu hiyamwovwahilili Nzambiku, dimuloña waweni waletesheli ajimbesheña mukala wawu wawuwahi wamwitempa.

Ifuku dimu, Nzambi wakamona nindi iseki dejima dinekali dadiwahi neyi chochadiñi itempa daEdeni. Kumbidi tukudiza ochuwunateli kudibombamu hakwila nawu iseki dikali muniyi njila. Hanu dinu, tusambili tutali ntahi chuma chayimwekeneni Adama naEvu.

Kutachika 2:16, 17; 3:1-13, 24; Chimwekeshu 12:9.