TLAPOUALISTLI 4

Tleka okinkixtijkej itech xochitlali

XIKITA tlen panotok. Kinkixtijtokej Adán uan Eva itech kualtsin xochitlali Edén. ¿Tikmati tleka?

Pampa yejuan okichijkej itlaj tlen sapanoa amo kuali. Ik non, Jehová kinkixtijtok. ¿Tikmati tlen tlamantli amo kuali okichijkej Adán uan Eva?

Okichijkej itlaj tlen toTajtsin Dios okinmilui amo ma kichiuakan. ToTajtsin Dios okinmilui uelis kikuaskiaj itlakilo nochtin kuajmej tlen okatkaj itech xochitlali. Maski ijkon, okinmilui amo ma kikuakan itlakilo se kuauitl, pampa tla kikuaskiaj, mikiskiaj. Non kuauitl okatka iaxka Jehová. Uan tikmatij tlajtlakoli tikonanaskej itlaj tlen amo toaxka, ¿amo melauak? Ijkuakon, ¿tlen opanok?

Se tonal ijkuak Eva okatka iselti itech xochitlali, se koatl okinotski. ¡Ximokuayejyeko! Koatl okilui Eva ma kikua itlakilo kuauitl tlen toTajtsin Dios okijto amo ma kikuakan. Ijkuak Jehová okinchijchi koamej, amo okinchijchi pampa ma tlajtokan. Ik non, akaj okichi ma tlajto koatl. ¿Akin okatka?

Amo okatka Adán. Ik non, yetoskia se ángel tlen Jehová okichijchi achto kichijchiuaskia Tlaltikpak. Ángeles amo ueli tikinmitaj. Se ángel opejki moueyimati. Opejki mokuayejyekoa tlanauatis ijkon ken toTajtsin Dios. Kinekia ma kitlakamatikan ye uan amo Jehová. Ye akin okichi ma tlajto koatl.

Nin ángel ueli okikajkaya Eva. Ijkuak okilui ye yetoskia ken toTajtsin Dios tla kikuaskia nin tlakilotl, Eva okineltokili. Ik non, okikua uan noijki Adán. Adán uan Eva amo okitlakamatkej toTajtsin Dios, ik non, ayakmo uelis chantiskiaj itech kualtsin xochitlali.

Maski ijkon, se tonal Jehová kichiuas nochi Tlaltikpak ma yeto kuajkualtsin ijkon ken okatka xochitlali Edén. Satepan tikitaskej ken uelis titlapaleuis pampa ma mochiua nin. Axkan ma tikitakan tlen okinpanok Adán uan Eva.

Génesis 2:16, 17; 3:1-13, 24; Apocalipsis 12:9.