BONA seo bjale se diregago mo seswantšhong. Adama le Efa ba rakwa serapeng se sebotse sa Edene. Na o tseba lebaka la seo?

Ke ka gobane ba dirile selo se itšego se sebe kudu. Jehofa bjale o a ba otla. Na o tseba selo se sebe seo Adama le Efa ba se dirilego?

Ba dirile selo se itšego seo Modimo a bego a ba boditše gore ba se ke ba se dira. Modimo o be a ba boditše gore ba ka ja dienywa tša dihlare tša serapeng seo. Eupša gape o be a ba boditše gore ba se ke ba ja dienywa tša sehlare se itšego ka gobane ge ba ka di ja ba be ba tla hwa. Sehlare seo e be e le sa gagwe a nnoši. Akere re a tseba gore ke phošo go tšea selo sa motho yo mongwe. Bjale go be go diregile eng?

Ka letšatši le lengwe ge Efa a be a le nnoši mo serapeng, noga e ile ya bolela le yena. Anke o nagane ka seo! E ile ya mmotša gore a je dienywa tša sehlare seo Modimo a bego a ba boditše gore ba se ke ba ja tša sona. Ge Jehofa a be a dira dinoga, ga se a ka a di dira gore di kgone go bolela. Ka gona se se ra gore go be go na le motho yo mongwe yo a bego a dira gore noga yeo e bolele. E be e le mang?

E be e se Adama. E swanetše go ba e be e le yo mongwe wa batho bao Jehofa a bego a ba dirile kgale pele ga ge a ka dira lefase. Batho bao ke barongwa gomme re ka se kgone go ba bona. Bjale go na le morongwa yo mongwe yo a ilego a ikgogomoša kudu. A thoma go nagana gore o swanetše go buša go swana le Modimo. E bile o be a nyaka gore batho ba kwe yena go e na le go kwa Jehofa. Ke yena yo a dirilego gore noga e bolele.

Morongwa yo o ile a kgona go fora Efa. Efa o ile a kgolwa morongwa yoo ge a be a mmotša gore o tla swana le Modimo ge e ba a ka ja seenywa seo. Ka gona o ile a ja gomme Adama le yena a ja. Adama le Efa ba ile ba se kwe Modimo, ke ka baka leo ba ilego ba lahlegelwa ke legae la bona le lebotse.

Eupša ka letšatši le lengwe Modimo o tla kgonthišetša gore lefase ka moka le dirwa le lebotse go swana le serapa sa Edene. Re tla ithuta ka morago kamoo le wena o ka thušago go le dira gore le be bjalo. Eupša ga bjale anke re bone seo se ilego sa diragalela Adama le Efa.

Genesi 2:16, 17; 3:1-13, 24; Kutollo 12:9.