NEA mɔɔ ɛlɛsi kɛkala la. Bɛlɛfoa Adam nee Yive bɛavi Yidɛn tola kɛnlɛma ne anu. Ɛze deɛ mɔɔ ɔti yera ye zɛhae la ɔ?

Ɔluakɛ bɛyɛle debie mɔɔ ɛnle kpalɛ fee la ati ɔ. Na ɛhye ati a Gyihova ɛlɛtwe bɛ nzo a. Asoo ɛze ɛtane mɔɔ Adam nee Yive yɛle a?

Bɛyɛle debie mɔɔ Nyamenle hanle hilele bɛ kɛ bɛmmayɛ la. Nyamenle hanle hilele bɛ kɛ bɛkola bɛdi mbaka ma mɔɔ wɔ tola ne anu la bie. Noko baka ko azo ma yemɔ Nyamenle hanle kɛ bɛmmadi bie, anrɛɛ bɛkɛwu. Ɔvale zɔhane baka ne ɔziele ɛkɛ ne kɛ ɔdaye mumua ne ye deɛ. Na yɛze kɛ ɔnle kpalɛ kɛ awie kɛva debie mɔɔ le awie gyɛne ɛdeɛ la, ɔnle zɔ ɔ? Aa, boni a zile a?

Kenle ko mɔɔ ɛnee Yive angome a wɔ tola ne anu la, ɛwɔlɛ bie dendɛle hilele ye. Dwenle nwolɛ nea! Ɔzele Yive kɛ ɔli baka ne mɔɔ Nyamenle ɛha ɛhile bɛ kɛ bɛmmadi zo ma la ma ne bie. Noko, mɔɔ Gyihova bɔle nwɔlɛ la yeambɔ bɛ mɔɔ bɛkola bɛtendɛ a. Ɔti mɔɔ ɛhye kile la ala a le kɛ awie gyɛne a ɛnee ɛlɛmaa ɛwɔlɛ ne adendɛ a. Ɛnee nwane ɔ?

Tɛ Adam ɔ. Yemɔti ɛnee ɔbayɛ menli mɔɔ ɛnee Gyihova ɛlumua ɛbɔ bɛ mekɛ tendenle kolaa na yeabɔ azɛlɛ ne la anu ko. Menli zɔhane mɔ le anwumabɔvolɛma, na yɛngola yɛnnwu bɛ. Anwumabɔvolɛ ko ɛhye rayɛle anwomemaazo. Ɔbɔle ɔ bo ɔzuzule kɛ ɔwɔ kɛ ɔdi tumi kɛ Nyamenle la. Na ɛnee ɔkpondɛ kɛ menli tie ye emomu tɛla kɛ bɛkɛdie Gyihova. Yemɔ a le anwumabɔvolɛ ne mɔɔ manle ɛwɔlɛ ne dendɛle la.

Anwumabɔvolɛ ɛhye holale yɛle Yive koasea. Mɔɔ ɔhanle ɔhilele ye kɛ saa ɔdi baka ma ne bie a ɔbayɛ kɛ Nyamenle la, ɔliele ye ɔlile. Ɔti ɔlile, na Adam noko lile bie. Adam nee Yive andie Nyamenle, na yemɔ ati a bɛ tola aako kɛnlɛma ne vile bɛ sa la.

Noko kenlebie Nyamenle banlea kɛ bɛbayɛ azɛlɛ ne amuala azo kɛnlɛma kɛ Yidɛn tola ne la. Amozii yɛbazukoa kɛ ɛbazi wɔahola wɔaboka nwo wɔamaa bɛayɛ ye zɔ la. Noko kɛkala, maa yɛnlea mɔɔ dole Adam nee Yive la.