KJIKJ, waut nu passieet! Adam un Eva woaren ut dän scheenen Goaden Eden rutjeschekjt. Weet wuarom?

See haben waut sea schlajchtet jedonen un Jehova bestroft an doafäa. Weetst du, waut see jedonen haben?

See haben waut jedonen, waut Gott an aufjesajcht haud. Von aule Beem em Goaden kunnen see äten buta von eenen. Von dän eenen Boom, haud Gott jesajcht, sullen see nich äten, sest wudden see stoawen. Gott wull dän fa sikj hoolen. Un soo aus wie weeten, doaf eena nich waut nämen, waut eenem nich jehieet. Well wie mol seenen, woo daut met Adam un Eva bat doa jekomen wia.

Eenen Dach wia Eva em Goaden auleen. Un stal die väa, doa funk eene Schlang aun met Eva to räden! Dee säd to Eva, see sull von de Frucht äten, waut Gott an aufjesajcht haud. Schlangen kjennen oba nich räden, wiels Jehova haft dee nich soo jemoakt. Daut mott een aundra jewast sennen, waut dee toom räden brocht. Wäa wia daut?

Adam wia daut nich. Dan mott daut eena von de Enjel jewast sennen, waut Jehova jemoakt haud, noch lang ea hee de Ieed muak. De Enjel sent Jeista, waut wie nich seenen kjennen. Een Enjel deed sikj met de Tiet sea groot un docht, hee must uk een Harscha sennen, soo aus Gott. Dee wull jieren haben, de Menschen sullen no am horchen enne Städ no Jehova. Krakjt dis Enjel wia daut, waut de Schlang toom räden brocht.

Dis Enjel kunn Eva betobren. Dee säd, see sull von de Frucht äten, dan wudd see soo sennen aus Gott. Eva jleewd dän daut un eet doavon. Uk Adam deed daut. Adam un Eva wieren Gott ojjehuarsom, un doawäajen veluaren see äa scheenet Tus, dän Goaden Eden.

Oba Gott woat doafäa sorjen, daut de gaunze Ieed noch mol woat soo scheen sennen, aus de Goaden Eden wia. Lota woa wie noch lieren, woo du kaust doabie methalpen. Nu well wie oba seenen, waut met Adam un Eva wort.