Tantara 4

Nanino Roze ro Niroàhy Baka amy Zariday Edena Ao?

MBA henteo moa ty raha miseho eto. Voaroake baka amy zariday Edena ao Adama noho Eva. Hainao va ty antone?

Nanao raha farane ze raty bibike roze, ka nosazìn’i Jehovah. Hainao va ty raha raty nataon’i Adama noho Eva?

Nataon-droze ty raha fa nandrarà-Ndranahare tsy tokone hataone. Nivòla tamine Andranahare fa azon-droze hany laha fa kila hazo amy zariday io ao. Fe hazo raike avao ro tsy azone hany, laha tsy zay le ho maty roze. Ahi-Ndranahare raike avao hazo io, sady haintsika fa tsy soa ty mangalake rahan’olo hafa, fa raty, sa tsy zay? Ka ino ty raha niseho?

Laha fa tamy zariday tao Eva raike avao, ndraike andro zay, le nisy bibilava niresake tamine. Eritsereto moa ty raha niseho! Nivòla tamin’i Eva bibilava io mba hihina hazo nandrarà-Ndranahare aze tsy hohàny iny. Tsy nanome fahefà ty bibilava hivòla mihitsy Andranahare laha fa namoro aze. Arake raha zay, le olo hafa ro nampivòla bibilava io. Ia zao ia?

Tsy Adama aloha io. Raike tamin’olo noforònin’i Jehovah taloha’ty nanamboarane ty tany iny io. Anjele olo reny, ka tsy afake mahita aze tsika. Nanjary niavonavo anjele raike io. Nanomboke nieritseritse ie fa tokone ho mpanjaka manahake an’Andranahare. Teane hanorike aze ty olo fa tsy hanorike an’i Jehovah. Io anjele nampivòla bibilava iny.

Afake namitake an’i Eva anjele io. Laha fa nivòla tamine ie fa hanahake an’Andranahare laha mihina amy voa hazo iny, le nino safàne zay Eva. Nihina ie, ka le nihina kea Adama. Tsy nanorike ty safà-Ndranahare Adama noho Eva, ka zay ty antone nandroàha an-droze baka amy zariday soasoa bibike iny io.

Fe mbo hatao-Ndranahare ho soasoa manahake zariday Edena io avao ty tany manontolo, ndraike andro any. Ho hitantsika afarafara any ty raha tokone hataontsika mba hahatanterake raha zay. Fe ho henteantsika tseky henany zao ze raha niseho tamin’i Adama noho Eva.

Genesisy 2:16, 17; 3:1-13, 24; Apokalypsy 12:9.