ASE ubuke kutsi kwentekani nyalo. Bo-Adamu na-Eva bayacoshwa ensimini lenhle yase-Edeni. Uyati kutsi bacoshelwani?

Kungenca yekutsi bente intfo lembi kakhulu. Ngako Jehova uyabajezisa. Uyayati yini lentfo lembi leyentiwe ngu-Adamu na-Eva?

Bente loko Nkulunkulu latsi bangakwenti. Nkulunkulu watsi bangadla ngekutsandza kwabo tonkhe titselo letilapha ensimini, kodvwa watsi bangasidli sitselo sesihlahla sinye, ngoba nabasidla batawufa. Leso sihlahla sasisakhe. Angitsi siyati kutsi kubi kutsatsa intfo yalomunye umuntfu angakasiphi? Yini-ke leyenteka?

Ngalelinye lilanga Eva ayedvwa ensimini, inyoka yakhuluma naye. Cabanga nje ngaloku! Yatsi akadle sitselo kulesihlahla Nkulunkulu abetsite bangadli kuso. Phela ngalesikhatsi Jehova adala inyoka akayentanga kutsi ikwati kukhuluma. Loku kusho kutsi kukhona lotsite lowenta lenyoka yakhuluma. Bekungubani loyo?

Bekungasiye Adamu. Kufanele kube ngulomunye kubantfu Jehova labebadale kadzeni asengakawudali umhlaba. Labo bantfu tingilosi, futsi angeke sikwati kubabona. Lengilosi lena yacala kutiphakamisa. Yacabanga kutsi nayo ingaba ngumbusi njengaNkulunkulu. Yayifuna kutsi bantfu balalele yona esikhundleni sekulalela Jehova. Ngiyo-ke lengilosi leyenta inyoka yakhuluma.

Lengilosi lena yakwati kuyenga Eva. Yamtjela kutsi utawufanana naNkulunkulu nakangadla lesitselo, futsi wayikholwa. Wasidla lesitselo, wanika na-Adamu naye wadla. Bo-Adamu na-Eva abazange bamlalele Nkulunkulu, kungako balahlekelwa likhaya labo leliyinsimi lenhle.

Kodvwa ngalelinye lilanga Nkulunkulu uyowenta umhlaba wonkhe ube yindzawo lenhle njengensimi yase-Edeni. Ngekuhamba kwesikhatsi sitawufundza kutsi wena ungahlanganyela kanjani ekwenteni umhlaba ube yinsimi lenhle, njenge-Edeni. Kodvwa kwanyalo ase sibone kutsi kwagcine kwentekeni ku-Adamu na-Eva.