ATAYÁÁ rí xtáa rarígá. Naguma xkriyaaʼ Adán ga̱jma̱a̱ Eva náa awúu̱n ixi̱ ri̱ʼi̱ Edén. Lá natayáá náa numuu ráʼ.

Numuu rí ni̱ni̱ mbá dí ra̱májánʼ wéñuʼ. Ikha jngó Jeobá naʼni rí mumíniiʼ. Lá natayáá ndiéjunʼ niʼni Adán ga̱jma̱a̱ Eva ráʼ.

Ni̱ni̱ mbá rí niʼthún Dios rí xúni̱. Dios má niʼthún rí ma̱ndoo mu̱phu̱ xúgíʼ xndúu ixi̱ dí rígá náa awúu̱n ixi̱ ri̱ʼi̱. Mú rígá mbóo ixi̱ rí niʼthún rí xúphu̱; á mu rí naʼphu̱, makhañún. Ikhaa kaʼyoo ixi̱ rúʼko̱. Ma̱ngaa nduʼyáá dí ra̱májánʼ mbuʼyá dí ndrígóo imba̱a̱, lá ragájkhun ráʼ. Mú, ndiéjunʼ nirígá rá.

Mbóo mbiʼi índo̱ rí Eva xtáa mbáwíi náa awúu̱n ixi̱ ri̱ʼi̱, mbáa a̱bu̱nʼ niʼthúu̱n. ¡Atatsaʼwáminaʼ! Ikhaa niʼthúu̱n Eva rí mikhu xndúu ixi̱ rí Dios niʼthún rí xúphu̱. Mú, índo̱ rí Jeobá niʼnin xúgínʼ a̱bu̱nʼ táʼniin mu muthi. Ikha jngó, xtáa imba̱a̱ xa̱bu̱ bi̱ niʼniuu maʼthí a̱bu̱nʼ buʼki̱. Tsáa lá ni̱ndxu̱u̱ xá.

Raʼkháa Adán. Ikha jngó gíʼmaa mani̱ndxu̱u̱ mbáa xa̱bu̱ bi̱ niʼnii itháan ginii Jeobá nákha xóó tséʼni Ku̱ba̱ʼ. Xa̱bu̱ buʼki̱ ninindxu̱ún ángeles, ma̱ngoo na̱nguá xú mbuʼñún. Ángel bugi̱ niʼnimbamínáʼ wéñuʼ. Nigi̱ʼdu̱u̱ nindxa̱ʼóo edxu̱u̱ rí gíʼmaa mani̱ndxu̱u̱ Xa̱bu̱ Ñajunʼ xóo Dios ga̱jma̱a̱ rí gíʼmaa majmambo̱o̱ rí gáʼthi ikhaa ki xóo Jeobá. Ikhaa niʼni rí a̱bu̱nʼ maʼthí.

Ángel bugi̱ nindoo niʼni ndu̱wa̱ʼ Eva. Índo̱ rí niʼthúu̱n rí ikhaa mani̱ndxu̱u̱ xóo Dios á mu naʼkhu xndúu ixi̱, ikhaa niʼnimbo̱o̱ rí niʼthúu̱n. Ikha jngó niʼkhu, ikhaa má niʼni Adán. Adán ga̱jma̱a̱ Eva túnimbu̱ún rí niʼthún Dios, ikha jngó ninimbáti̱ga̱ náa rí mitsaan rí kaʼñúún makuwá, náa awúu̱n ixi̱ ri̱ʼi̱.

Mú maʼga̱nú mbá mbiʼi rí Dios maʼni rí xúgíʼ Ku̱ba̱ʼ maʼni̱i̱ mitsaan xóo má náa awúu̱n ixi̱ ri̱ʼi̱ náa Edén. Nda̱wa̱á mbuʼyáá xú káʼnii ikháánʼ ma̱ndoo matani̱ rí maʼni xúʼko̱ kaʼnii. Rí xúgi̱ mbuʼyáá ndiéjunʼ nigíʼnuu Adán ga̱jma̱a̱ Eva.