ASO koany nuiswamasi kwana. Eutai do airutar Adam ka Keba kinga, anyoun omanikor loka Eden lo ebus. Ijeni kanukinyo?

Naarai apotu kesi iswamata icebore yen arono noi. Kanukangun ejai do Yawe aitisilar kesi. ljeni ijo ibore yen aronon yen apotu Adam ka Keba iswamaata?

Apotu iswamata ibore yen alimokinit Edeke kes mam aswam. Alimokinit Edeke kesi ainyam araito nuka ikito luka omanikor. Konye araito nuka ekitoi ediopet alimokinit Edeke kesi mam ainyam tetere mam etwakete. Edarit ngesi ekitoi ngol kwape loke. Ijeni oni ebe, erono eyangaar ibore yen ebeit icetunganan, mam oni icamunit kereka ngun? Aso, inyo abu otakanu?

Adiopepaaran, ne ajaar Keba bon toma omanikor, abu emun inerakinos kanges. Koomoom ber ijo kanukangun! Abu emun olimok Keba ainyam araitoit naka ekitoi lo alimokinit Edeke kes mam ainyam. Aso, ne asubia Yawe imunuo, mam ngesi asubit kes tetere inerasi. Itodunit do ne cut ebe ice nges ainakinit emun einer. Ingai bo ngol?

Mam arai Adam. Aso arai do idiopet kotunga lumoyoon lu asubit Yawe sek eroko esuba akwap. Itunga ngul lumoyoon kes imalaikan ido mam oni ipedori aanyuun kes. Emalaika lo, abu opogakin. Abu ogeu aomoom ebe ebusakinit nges da araun epugan kwape eraar Edeke. Ido akoto ngesi itunga arimarit ngesi itia arimarit Yawe. Ngesi emalaika lo esipedori emun ainer.

Abu emalaika lo opedo aingalingal Keba. Abu kolimok ngesi ebe eputoor ngesi da bala Edeke arai enyam araitoi, abu do ngesi iyuu ngun. Abu konyam kosodi Adam da ainyam. Apotu do Adam ka Keba komuangata Edeke, ido ngupengun akwakiaratar erekec lo ajai omanikor lo ebus.

Konye apaaran ace kongaren, ebuni bobo Edeke aanyun ebe itarauno akwap kere na ejokuna kwape ajaar emanikor loka Eden. Ibuni oni aisiasiaun epone lo iticepak ipedoria ijo da aimor aitaraun akwap naibus kwana. Konye do ber, ajenutu nuu apotu kotakanikisi Adam ka Keba.