NENGE ase kwagh u a lu zan hemen hegen ne. Mba zendan Adam man Ifa ken sule u doonashe ne kera. Ú fa ityôkyaa kpa?

Ka sha ci u ve er kwagh u vihin kpishi. Nahan Yehova ngu tsahan ve. Ú fa kwaghbo u Adam man Ifa yange ve er la kpa?

Yange ve er kwagh u Aôndo kaa er ve̱ de eren ga yô. Aôndo kaa a ve er vea fatyô u yan kwaghyan u sha ikon i ken sule la. Kpa kon u môm ken sule la yô Aôndo kaa er ve̱ de ye ga, ga yô vea kpe. Yange ver kon la er ú lu u ná. Man se fa ka shami ga u tôôn kwagh u a lu u orgenegh yô, shin se fa ga? Ka shami, kanyi yange i ere?

Iyange i genegh yô shighe u Ifa lu un tswen ken sule yô, iyô i lam a na. Hen sha kwagh ne yôô! Yange i̱ kaa a Ifa er a̱ ya ityamegh ki sha kon ú Aôndo kaa er ve̱ de ye ga la. Nahan cii kpaa, shighe u Yehova gba iyô la a gba i̱ er i ôron kwagh ga. Nahan kwagh u a lu yô yange lu orgenegh nan lu eren iyô la i̱ lu lamen ye. Lu ana?

Yange lu Adam ga. Nahan ka keng yange lu môm ken ior mba yange Yehova gba ve ngise cii man mase gban tar la. Ior mbara ka mbatyomov, man se fatyô u nengen a ve ga. Ortyom ne yange hii u gengese iyol. Hii u henen er un kpaa una lu orhemen er Aôndo nahan. Man shi a soo er ior ve̱ ungwan un a u ma ve ungwa Yehova la. Ka ortyom la yange er iyô la i̱ lam ye.

Yange ortyom ne fatyô u tsughun Ifa. Er a kaa a na er una hingir er Aôndo nahan shighe u una ya kon shon la yô, a na un jighjigh. Nahan man a ya, man Adam kpa ya. Adam man Ifa ve hemba Aôndo ato, man ka sha ci u nahan ve yange ya ve u sule u doonashe la saa ye.

Kpa iyange i genegh Aôndo una nenge er tar cii hide engem vough e̱r sule u Eden la nahan. Ken hemen yô se hen sha er we kpa ú nyôr iyol sha u nôngon wer i̱ lu nahan yô. Kpa hegen yô, de se fa kwagh u a er Adam man Ifa yô.