LUKIM samting i kamap nau. God i rausim Adam na Iv long naispela gaden Iden. Yu save bilong wanem em i mekim olsem?

Long wanem, tupela i mekim pasin nogut tru. Olsem na Jehova i givim strafe long ol. Yu save wanem pasin nogut ol i bin mekim?

Tupela i mekim samting God i bin tambuim ol long mekim. God i tokim tupela olsem ol i ken kisim kaikai long ol diwai i stap long gaden. Tasol long wanpela diwai God i tok ol i no ken kaikai, sapos ol i kaikai, bai ol i dai. Dispela diwai em bilong God yet. Na yumi save olsem i no stret long kisim samting bilong narapela man, a? Orait, wanem samting i kamap?

Wanpela taim Iv tasol i stap long gaden, na wanpela snek i toktok long em. Tingim! Snek i tokim Iv long kaikai prut bilong diwai God i bin tambuim ol long en. Taim Jehova i wokim ol snek, em i no wokim ol na ol inap toktok. Olsem na yumi save, wanpela man i tromoi tok long maus bilong snek na i olsem snek yet i toktok. Dispela man em husat?

Em i no Adam. Em wanpela bilong ol man Jehova i wokim paslain tru long em i wokim graun. Ol dispela man i ensel, na yumi no inap lukim ol. Wanpela bilong ol dispela ensel i kisim pasin antap. Em i kirap kisim tingting olsem em i mas kamap olsem God. Na em i laik bai ol man i mas bihainim tok bilong em na ol i no ken bihainim tok bilong Jehova. Dispela ensel i mekim na i olsem snek i toktok.

Ensel hia i giamanim Iv. Taim ensel i tokim Iv long em bai kamap olsem God sapos em i kaikai dispela prut, Iv i bilipim tok bilong em. Olsem na em i kaikai dispela prut, na Adam tu i kaikai. Tupela i sakim tok bilong God, olsem na God i rausim ol long dispela naispela gaden.

Tasol bihain God bai mekim dispela graun olgeta i kamap naispela ples tru olsem gaden Iden. Bihain bai yumi kisim save long olsem wanem yu tu inap insait long wok bilong mekim graun i kamap kain ples olsem. Tasol nau yumi ken stori long samting i painim Adam na Iv.