DORA hati ekiri hanu. Adamu na Hawa nibabingwa okuruga omu rugonjo orurungi muno orw’Adeni. Nomanya habwaki?

Habwokuba bakozire ekintu ekibi muno. Nahabwekyo Yahwe abafubiire. Nomanya ekibi Adamu na Hawa eki baakozire?

Bakakora eki Ruhanga akaba abatangire okukora. Ruhanga akabaragira okulya ha buli muti ogw’omu rugonjo. Baitu ha muti gumu Ruhanga akabagamba obutagulyaho baleme kufa. Gunu omuti Ruhanga akagwesigaliza. Nitumanya ngu kibi muno okutwara ekintu ky’omuntu ondi, tinukwo? Mananu, kiki ekyabaireho?

Kiro kimu Hawa obwakaba ali wenka omu rugonjo, enjoka ekabaza nawe. Kicumitirizeho! Ekagambira Hawa okulya ha muti ogu Ruhanga akaba abatangire. Ruhanga atahange enjoka n’obusobozi bw’okubaza. Nahabwekyo nikimanyisa ngu haroho omuntu ondi owakaba nagambisa enjoka. Noha ogu akaba nabaza?

Atabe Adamu. Atekwa kuba yabaire ali omu habihangirwe, Yahwe ebi yahangire ensi enu obwekaba etakahangirwe. Ebihangirwe ebyo byali bamaraika. Titurukusobora kubarora. Maraika onu omu akatandika okwehemba. Akatandika kutekereza ngu nawe nasobora kuba mulemi nka Ruhanga. Akagonza abantu bamworobere mukikaro kyokworobera Yahwe. Maraika onu nuwe yaletiire enjoka okubaza.

Maraika onu akasobora kubihabiha Hawa. Obu yagambiirwe ngu naija kusisana Ruhanga obu yakuliire ha muti ogu yatangirwe, nawe akakikiriza. Hanyuma akalya ha muti na Adamu nawe. Adamu na Hawa bakajemera Ruhanga. Egyo niyo songa habwaki baaferirwe amaka gabu ag’omu rugonjo amarungi.

Baitu obusumi nibwija Ruhanga obwarukwija kufoora ensi yoona kuba nungi nk’orugonjo rw’Adeni. Nitwija kwegaho nkoku tusobora naitwe kubagana mukugifoora nungi. Baitu hati katurole kiki ekyahikire ha Adamu na Hawa.