KITAA an nahitabo yana. Ginpaiwas hira Adan ngan Eva ha makaruruyag nga hardin han Eden. Maaram ka ba kon kay ano?

Tungod kay may-ada hira ginbuhat nga maraot gud. Salit ginsirotan hira ni Jehova. Maaram ka ba kon ano an maraot nga ginbuhat nira Adan ngan Eva?

Ginbuhat nira an igindidiri han Dios. Ginsidngan hira han Dios nga puydi nira kaunon an bunga han ngatanan nga kahoy ha hardin. Kondi may-ada usa nga kahoy nga an bunga diri ginpapakaon ha ira, kay kon kumaon hira, mamamatay hira. An Dios an tag-iya hito nga kahoy. Sayop an pagkuha han butang han iba, diri ba? Kondi, ano an nahitabo?

Usa ka adlaw han nag-uusahan hi Eva ha hardin, ginkaistorya hiya hin halas. Hunahunaa la ito! Nagsiring ito kan Eva nga kumaon han bunga han kahoy nga igindidiri han Dios. Maaram kita nga waray laranga ni Jehova nga magyakan an mga halas. Salit nagpapasabot la ito nga may-ada iba nga nagyayakan pinaagi han halas. Hin-o?

Diri hi Adan. Kon sugad, makakasiguro kita nga usa ito han mga persona nga maiha na nga ginlarang ni Jehova antes himoon an tuna. Hira an mga anghel, ngan diri naton hira nakikita. May-ada usa nga anghel nga nagin mapahitas-on gud. Naghunahuna hiya nga sadang magin magmarando hiya pariho han Dios. Ngan karuyag niya nga an mga tawo sumunod ha iya imbes nga kan Jehova. Hiya an anghel nga nagyakan pinaagi han halas.

Nalimbongan hito nga anghel hi Eva. Han ginsidngan hito hi Eva nga magigin pariho hiya han Dios kon kumaon hiya han bunga, tinuod hi Eva. Salit kinaon hiya, ngan hi Adan liwat. Waray sumugot ha Dios hira Adan ngan Eva, salit ginpaiwas hira ha ira makaruruyag nga urukyan nga hardin.

Kondi maabot an panahon nga sisiguruhon han Dios nga an bug-os nga tuna magigin makaruruyag sugad han hardin han Eden. Ha sunod, hibabaroan naton kon paonan-o ka makakabulig ha pagpaopay hito. Kondi aton kitaon yana kon ano an nahitabo kanda Adan ngan Eva.