Tantara 4

Nan̈ino Ma Irô Niala Tamy Paradisa Tao?

ZAHAVA baka raha nahazo irô io. Adama ndreky Eva voaroaka boaka amy zaridain̈y tsara be tao. Hainao ino antony?

Fôtony irô nan̈ano raha farany ratsy, ke nisazin’i Jehovah. Hainao raha ratsy nataon’Adama ndreky Eva?

Irô tsy nan̈araka volan̈a Zan̈ahary. Izy nan̈aomba irô hihina voankazo jiaby tamy zaridain̈y tao, fa voankazo karazany araiky fo tsy nimboany ahanin̈y. Izikoa irô mihina izio, maty edy. Nin’ny Zan̈ahary zaraiky fo izio. Mety ma mangala raha tsy nin-taina? Tsy mety, tsy zen̈y? Ino amy zay raha niboaka?

Tandraraiky, Eva zaraiky fo tamy zaridain̈y tao. Nisy bibilava nikoran̈a taminany. Izio nan̈iraka Eva hihina voankazo tsy nimboan’ny Zan̈ahary ahanin̈y in̈y. Bibilava tsy nataon’ny Zan̈ahary hivolan̈a. Dikan’izen̈y, nisy olo nampivolan̈a bibilava io. Azôvy fo basy zen̈y?

Izio tsy Adama. Tsy maintsy araiky amin’anjely niasain’ny Zan̈ahary talohan’ny niasany tany fo zen̈y. Irô io tsy hita maso. Nanjary tia tain̈a anjely araiky io. Tsy nadosony tan̈aty jerinany hanjary karaha Zan̈ahary zen̈y. Tiany olo han̈araka volan̈anany fa tsy han̈araka volan̈a Jehovah. Izy nampivolan̈a bibilava in̈y.

Vitan’anjely io tsarabekiny namadiky jerin’Eva. Lera izy nivolan̈a fa Eva hanjary miran̈a Zan̈ahary izikoa mihina izio, naraihan’Eva volan̈anany. Ke izy nihina, baka iô Adama koa. Adama ndreky Eva tsy nan̈araka volan̈a Zan̈ahary, ke irô niroasin’i Jehovah niala tamy Paradisa.

Zan̈ahary mbala han̈ano tany jiaby ty paradisa, miran̈a zaridain̈’Edena in̈y. Mbala ianaratsika afara an̈y faomba mety an̈anaovanao zen̈y koa. Fa atsika iziô hizaha raha nahazo Adama ndreky Eva.

Genesisy 2:16, 17; 3:1-13, 24; Apokalypsy 12:9.