BIBIʼ gannlo xi ni cayac. Careʼ Adán né Eva lainy lagary sacroyen ni laa Edén. ¿Nanlo xigony la?

Portín bunyibu toib cós ni nigolú mal. Por ngú, Jehová diti caduidy lagary guianyibu cú. ¿Nanlo xí ni buny Adán né Eva la?

Bunyibu ni Dios góoch layibu que diti non ñoyibu xcaa yac reʼ. Dios góoch layibu que labúu guáyibu stipnés xcaa yac ni noʼ lainy lagary móz cú. Per xcaa toib yac cuánnax Dios góoch layibu que diti guáyibu láani pal ñoyibu láani saityibu. Yac cuánnax reʼ diti xtunyibu gocni, né nánno mal láani guicaʼno xtuny stoib buñ, nigoreʼ guibino ¿xí gocyibu?

Toibtica dzú órni nosi Eva bian lainy lagary móz cú, toib beʼel goniné láabu. ¡Bunysi xpensarylo! Beʼel reʼ goniné Eva que ñobu xcaa yac cuánnax ni Dios góoch layibu diti non ñoyibu. Órni Jehová bisaʼ guirá beʼel diti golóbu laay layimu par guinimu. Goyoʼ stoib buñ ni buny que beʼel reʼ naní. ¿Nanlo chú láabu la?

Diti gócbu Adán. Ni buny guirá ndeʼ ngú toib buñ ni Jehová bisaʼ dzú ni yása guisaʼbu Gudxlio. Guirá buñreʼ ángeles gocyibu né diti labúu rabino layibu. Ángel reʼ farmay gócbu. Bunybu pensary gony mandarybu xomod Dios né que stipnés buñ guisob láabu diti a Jehová. Láabu bunybu que beʼel reʼ goní.

Ángel reʼ biscuʼ Eva. Órni ángel reʼ góoch láabu que pal ñobu cuánnax cú nadxín ñacbu xomod Dios, Eva biluladx ni goní ángel reʼ. Por ngú, godóbu cuánnax reʼ né Adán láaca godó láani. Adán né Eva diti bisobbu Dios, por ngú, bisnityibu lidxyibu lainy lagary sacroyen reʼ.

Sioʼ dzú Dios sony que Gudxlio reʼ guidxin gacni toib lagary móz xomod góc Edén. Reʼ guisuidylo xi non gonylo par labúu gacnélo que Gudxlio guidxin gac toib lagary móz. Nigoreʼ guibino xi gosaclo Adán né Eva.