Ododo 5

Kwo Matek Ocakke

IKARE ma dong gipe i poto me Eden, Adam gin ki Kawa gubedo ki peko mapol. Gin omyero guti matek me nongo cam. Ma ka yadi mabeco, gin guneno okuto ki ocok mapol aye tye ka twi i ngetgi. Man aye gin ma otimme i kare ma Adam gin ki Kawa gukwero winyo Lubanga kacel ki giko bedo lureme.

Ento ma dong rac loyo meno, Adam gin ki Kawa gucako to woko. Wi po ni, Lubanga ocikogi-ni, ka gucamo nyig yat moni ci gibito. Ada, i nino ma gucamo iye kikome, gucako to woko. Onongo obedo me mingo tutwal pi gin me kwero winyo Lubanga!

Lutino pa Adam gin ki Kawa ducu kinywalogi i kare ma dong Lubanga oryemogi woko ki i poto me Eden. Man te lokke ni lutino-ni bene omyero guti dok guto woko.

Ka nene Adam gin ki Kawa guwinyo Jehovah, onongo kono kwo obedo mit pigi ki pi lutinogi. Gin ducu kono gukwo nakanaka ki yomcwiny i lobo. Ngat mo pe ma onongo obiti, two ka to.

Lubanga mito ni dano gukwo ki yomcwiny nakanaka, dok En ciko ni i nino mo gibibedo kumeno. Pe lobo keken aye bibedo maber, ento dano ducu gibibedo ki yot kom. Jo ducu ma i lobo gibibedo lurem dok lurem Lubanga bene.

Ento Kawa onongo dong pe larem Lubanga. Pi meno i kare ma en nywalo lutino, pe onongo yot bote. En owinyo arem. Bedo labongo winyo Jehovah ada okelo bote kumo madit, in pe iye man?

Adam gin ki Kawa gunywalo awobe ki anyira mapol. I kare ma kinywalo latin laco me acel, gin gucako nyinge ni Kain. Gin gucako nying latin-gi ma laco me aryo ni Abel. Gin ango ma otimme i komgi? In ingeyo?

Acakki 3:16-23; 4:1, 2; Niyabo 21:3, 4.